Pisalem 37:33-40

³³gei ogo Dimaadua hagalee diiagi a mee gi ono hagadaumee, be e diiagi hua a mee gii hai ono hai go digaula i dono madagoaa ma gaa hai ono gabunga.

³⁴Hagadagadagagee gi Dimaadua mo di hagalongo ang gi ana haganoho, gei Mee ga hagalabagau goe ga gowadu gi di goe tenua deelaa, gei goe gaa mmada gi digau huaidu ala ga hagabagi gi daha.

³⁵Au gu gidee tangada hai mee huaidu ge hagamuamua huoloo. Mee koia e duuduu i hongo nia daangada gadoo be di laagau ‘cedar’ o Lebanon.

³⁶Nomuli, gei au gu hana laalaa i di gowaa deelaa, gei mee gu de igolo. Au gu halahala a mee, gei au digi gidee a mee.

³⁷Haga dina ina tangada humalia, mmada gi tangada e haihai nia mee donu: tangada dela e noho i di aumaalia la dono hagadili i golo.

³⁸Gei digau ala e haihai nia huaidu le e daaligi gi daha, gei nia hagadili ni digaula le e haga mmaa gi daha.

³⁹Dimaadua le e haga dagaloaha digau ala e haihai nia mee donu, ge e madamada humalia i digaula i lodo nia madagoaa haingadaa.

⁴⁰Mee e hagamaamaa digaula ge e haga dagaloaha digaula. Mee e haga dagaloaha digaula gi daha mo digau huaidu, idimaa, digaula e hula gi Mee bolo gi abaaba ginaadou.