Pisalem 37:13-31

¹³Malaa, di Tagi e gadagada gi digau ala e hai mee huaidu, idimaa, Mee e iloo Ia bolo digaula gu hoohoo hua ga hagalee.

¹⁴Digau ala e hai nia mee huaidu e haga mmuu aga nadau hulumanu dauwa, mo di hagatogomaalia nadau maalei belee daaligi digau hagaloale mo digau ala e noho huaidu ang gi ginaadou, e daaligi gii mmade digau ala e hai nadau mee donu.

¹⁵Malaa, digaula gaa bida daaligi hua gi nadau hulumanu dauwa donu, gei nia maalei digaula ga hadihadi.

¹⁶Nia mee dulii ala e hai mee ginai tangada humalia, la koia e dahidamee i nia maluagina o digau hai mee huaidu dogologo,

¹⁷idimaa, Dimaadua la ga daa gi daha nia maaloo o digau ala e hai nia mee huaidu, ga hagaloohi digau ala e humalia.

¹⁸Dimaadua le e madamada humalia hua i digau ala e hagalongo ang gi de Ia. Gei ogo digaula ga hai mee gi tenua deelaa, gaa hana hua beelaa.

¹⁹I lodo di madagoaa haingadaa, gei digaula hagalee e huaidu ang gi ginaadou. I lodo di madagoaa tau magamaga, gei digaula e logo hua nadau meegai.

²⁰Gei ogo digau ala e hai nia mee huaidu la gaa mmade, nia hagadaumee a Dimaadua la ga hagalee gadoo be nia akai ala i lodo henua. Digaula ga hagalee gadoo be nia huiahi.

²¹Digau huaidu le e kae nadau mee boibana, hagalee hui, gei digau humalia e dumaalia i nadau wanga dehuia.

²²Digau ala gu haga maluagina go Dimaadua la aalaa digau ga hai mee gi tenua deelaa, gei digau ala gu haga halauwa go Dimaadua, le e hagabagi gi daha.

²³Dimaadua le e dagi gidaadou i di ala dela belee hula ai gidaadou, ge e abaaba digau ala e haga tenetene dono manawa.

²⁴Maa digaula ga monnono, digaula hagalee bolo ga mmoe hua beelaa i lodo di gelegele, idimaa Dimaadua ga haga noho aga digaula gi nua.

²⁵Au gu madumadua dolomeenei, au gu mouli waalooloo, gei au digi mmada loo gi nia daangada humalia gu diiagi go Dimaadua, be go nia dama digaula e tangitangi gi nia daangada i nia meegai.

²⁶Nia madagoaa huogodoo, gei digaula e dumaalia, e wanga nadau bahihadu gi nia daangada e hai hegau ai, gei nadau dama la guu hai di haga maluagina ni digaula

²⁷Maaliu mai gi daha mo nia mee huaidu, heia nia mee humalia, gei do hagadili gaa noho i tenua deelaa, gaa hana hua beelaa,

²⁸idimaa, Dimaadua le e aloho di mee dela e donu, gei Mee hagalee diiagi ana daangada ala e manawa dahi. Nia madagoaa huogodoo, gei Mee e hagaloohi digaula gei di hagadili ni digau hai mee huaidu le e hagabagi gi daha.

²⁹Digau ala e haihai nia mee donu ga hai mee gi tenua deelaa, gaa noho i tenua deelaa gaa hana hua beelaa.

³⁰Nia helekai o tangada humalia le e honu i nia kabemee, mee e helehelekai i di tonu i nia madagoaa huogodoo.

³¹Nia haganoho o dono God le e benebene i lodo dono manawa, gei mee hagalee tanga gi daha mo nia maa.