Pisalem 31:19-24

¹⁹E haga goboina huoloo go nia mee humalia ala e benebene Kooe ang gi digau ala e hagalaamua Goe! Digau huogodoo gu iloo bolo Goe e humalia huoloo, ge e benebene mo di abaaba hagahumalia digau ala e hagadagadagagee adu gi di Goe.

²⁰Goe e hagammuni digaula hagahumalia i mua o hadumada gi daha mo nia haganohonoho o nia daangada. Goe e hagammuni digaula gi lodo di gowaa humalia gi daha mo nia helekai huaidu o nadau hagadaumee.

²¹Hagaamu ina Dimaadua! E hagagoboina huoloo behee go Mee dela ne hagamodongoohia mai dono aloho gi di au i di madagoaa ogu hagadaumee la ne hii mai i dogu gili ga heebagi mai.

²²Au gu madagu huoloo, gu maanadu bolo Mee guu hudu au gi daha, ge deeai, Mee gu longono Ia dagu dangi i dogu madagoaa ne gahigahi a Mee belee hagamaamaa au.

²³Aloho i Dimaadua, goodou huogodoo ala go ana daangada manawa dahi! Dimaadua e abaaba digau ala e manawa dahi! Gei Mee e hagaduadua digau ala e hagamuamua gii tau gi nadau mee hala ala ne hai.

²⁴Goodou huogodoo ala e hagadagadagagee gi Dimaadua, goodou gi maaloo mo di hagamahi.