Pisalem 22:8-31

⁸mo di helekai, “Goe gu hagadagadagagee gi Dimaadua, gei Mee e aha dela hagalee haga dagaloaha goe? Maa nei bolo Dimaadua le e hiihai adu gi di goe, Mee la e aha dela hagalee hagamaamaa goe?”

⁹Ma Kooe hua dela nogo benebene au i dogu madagoaa ne haanau ai, gei di maa Kooe labelaa dela nogo hagaloohi au i dogu madagoaa nogo ligiana.

¹⁰Au nogo hagadagadagagee adu gi di Goe mai i dogu madagoaa ne haanau ai, gei di maa Kooe hua dela nogo hai di God ni oogu i nia madagoaa huogodoo.

¹¹Goe hudee haga mogowaa ina Goe gi daha mo au! Nia haingadaa llauehe gu hoohoo mai, gei di maa tangada e hagamaamaa au ai.

¹²Nia hagadaumee e dogologowaahee e haganiga au gadoo be nia kau daane, digaula e hai gadoo be nia kau daane llamu dauwa o Bashan.

¹³Digaula e hanga nadau ngudu be nia laion, e wwolowwolo bolo ginaadou e hahaahi au.

¹⁴Au gu deai ogu mahi ai, ogu mahi gu hagalee gadoo be nia wai ala ne malingi gi hongo di gelegele. Ogu iwi huogodoo gu monnono gi daha mo nadau dudaginga, mo dogu hadu manawa gu waiwai gadoo be nia kiliidi.

¹⁵Dogu akii gu maangoo gadoo be nia gohu dogolia. Dogu holole gu pigi aga gi baahi gi nua dogu ngudu. Goe ne diiagi au gi lodo nia gohu dogolia bolo gii made au.

¹⁶Di buini gau huaidu e haganiga mai i dogu gili gadoo be di hagabuulinga paana e mmui mai gi di au. Digaula e gadigadi ogu lima mo ogu wae.

¹⁷Ogu iwi huogodoo gu kila mai haga modongoohia. Ogu hagadaumee e madamada mai gi di au mo di dadaumada au.

¹⁸Digaula e bilei gi ogu gahu, mo di duwwe nia maa i ginaadou.

¹⁹Meenei Dimaadua, Goe hudee haga mogowaa ina Goe gi daha mo au! Goe hagalimalima mai, e daa au gi daha mo di haingadaa!

²⁰Haga dagaloaha ina au gi daha mo tulumanu dauwa. Haga dagaloaha ina dogu mouli gi daha mo nia paana aanei.

²¹Daawa au gi daha mo nia laion aanei. Au gu deai dogu hagamaamaa i mua nia kau daane llamu dauwa aanei ai.

²²Au ga hagi anga do ingoo gi ogu duaahina. Au ga hagaamu Goe i lodo nadau hagabuulinga daangada,

²³ga helekai boloo, “Goodou go nia daane hai hegau a Dimaadua, goodou hagaamuina a Mee! Goodou go di hagadili ni Jacob, goodou hagalaamua ina a Mee! Goodou go digau Israel, goodou daumaha gi Mee!

²⁴Mee hagalee diiagi digau hagaloale, be e haga balumee nia hagaduadua digaula. Mee hagalee huli gi daha mo digaula, Mee e hila ang gi digaula i di nadau madagoaa ma ga gahigahi a Mee.”

²⁵Au ga hagaamu Goe i lodo nia hagabuulinga llauehe. Au gaa hai agu tigidaumaha ala ne hagababa adu ko au i mua digau ala e daumaha adu gi di Goe.

²⁶Digau hagaloale gaa gai nadau hagabae mee ala e hiihai ginai. Digau ala e lloomoi gi Dimaadua ga hagaamu a Mee. Digaula la gi haadanga lamalia gaa hana hua beelaa!

²⁷Nia henua huogodoo ga langahia a Dimaadua. Digaula ga maaliu mai gi Mee mai i nia mada huogodoo o henuailala. Nia hagadilinga daangada henua huogodoo ga daumaha gi Mee.

²⁸Dimaadua la di king, go Mee e dagi nia henua.

²⁹Nia daangada hagamuamua huogodoo gaa pala gi Mee. Nia daangada dangada huogodoo gaa pala gi mua o Mee.

³⁰Nia adu daangada huogodoo ala ga lloo aga dagidilaangi ga hai hegau gi Mee. Digaula ga hagi anga gi nia madahaanau ala ga lloo aga maalia di hai o Dimaadua.

³¹Nia daangada ala digi haanau ga hagalongo boloo, “Di Tagi gu benebene ana daangada!”