Pisalem 135:5-19

⁵Au guu donu mai gi di au bolo Dimaadua le e aamua, e koia e aamua i hongo nia god huogodoo.

⁶Mee e hai ana mee huogodoo ala e hiihai ginai i di langi i nua mo i henuailala, mo i lodo di moana mo i di gowaa llala.

⁷Mee e gaamai nia gololangi madangi gono i nia mada o henuailala. Mee e hai nia ila gi dabadaba i lodo di madangi gono, ge e gaamai di madangi gi daha mo dono lohongo nogo benebene ai.

⁸Mee gu daaligi gii mmade nia ulu mmaadua huogodoo o Egypt, nia ulu mmaadua daangada mono manu.

⁹Mee guu hai nia hagadilinga mogobuna haga goboina i di gowaa deelaa belee hagaduadua di king mo ana gau hai hegau aamua.

¹⁰Mee gu daaligi ana daangada dogologowaahee mono king maaloo:

¹¹ala go Sihon, di king o digau Amor, mo Og, di king o Bashan, mo nia king huogodoo o Canaan.

¹²Mee guu wanga nia henua digaula gi ana daangada, guu wanga nia maa gi Israel.

¹³Meenei Dimaadua, gimaadou guu dugu Goe bolo di God ni gimaadou i nia madagoaa huogodoo. Nia hagadili huogodoo ga langahia e ginaadou Goe.

¹⁴Dimaadua ga haga dagaloaha ana daangada. Mee ga manawa aloho i ana gau hai hegau.

¹⁵Nia god o nia henua la nia mee ne hai gi nia silber mo nia goolo, nia maa la ne hai gi nia lima dangada.

¹⁶Nia god digaula nadau ngudu i golo, ge e deemee di leelee, nadau golomada i golo, ge e deemee di mmada.

¹⁷Digaula nadau dalinga i golo, ge e deemee di hagalongo, digaula nadau ngudu i golo, ge e deemee labelaa di dogidogi.

¹⁸Digau huogodoo ala ne hai nia maa gei e hagadagadagagee gi nia maa, la gii hai be nia balu god ala ne hai go ginaadou!

¹⁹Hagaamu ina Dimaadua, goodou go nia daangada Israel, hagaamu ina a Mee, goodou go digau hai mee dabu a God!