Paisowa 10:19-39

¹⁹Pita tautau ni aniyona hola ya fafadosi yo fede Yaluwa iyen, U ataꞌatahi! Tatau faihona sa laulau yoꞌoim haꞌa sa mahanoma ite.

²⁰U obiyo be u feula lidi u itadi. Tabu u nuwa ladu na ma afa haidam au lau paꞌana yau E fatamalidima.

²¹Yo fede Pita ya leta lidi be ya falibadi iyen, Aee–! Ami yoꞌoyoꞌoigu. Yau logegu ite. Sidohana be ami laoma?

²²Alinana sa bui tiyen, Hiyala tau lau kulukuluwenna hesana Koniliyesi ya fatamalimai. Diusi mahudoꞌidi sa liba faloholoho tiyen, “Koniliyesi mate Yaubada tau fafaꞌatitiyenna yo tau laulau dudulai hesa.” Yaubada ena anelu tabuna ya libalau lisina bena te lau ena luma be somo wa libaen haba ya atahi.

²³Habahim, Pita ya falibadi sa lau luma ganahewana be sa famala ana taumana. Paisowa 10:23-33 Bobonna ma hwalahwalalana, ma afa haidadi Diyopa tau kawawananaha hahaisa sa aulaha sa lau.

²⁴Lahai fafaluwagana yai sa mahano lau Siseliya. Koniliyesi ma afa efana yo afa haidana safalumadi ya yogaidi mate Pita sa bagibagiyen amainiya.

²⁵Pita bena ya luhulau, na yo fede Koniliyesi maꞌena sa failobahi. Koniliyesi ya hoba lidi ahena yai be ya fadebasae.

²⁶In moho Pita ya abi famwaito na iyen, U obiyo! Yau doga gaibu yo ita gonogonowada.

²⁷Pita yo Koniliyesi sa laulau libaliba ee–, sa luhulau luma ganahewana na amainiya mate dodoga boludi haꞌa sa faꞌoigogo, ya itadi.

²⁸Ya libalau lisidi iyen, Haꞌa ami siba fuyoimiu mate ai Diusi ema andabu yo sigu yawasi laugagayodi yai ya libaen mate tabu umi, nuꞌu hahaisa dodogamiu, yo ai, ta faꞌilu. In moho Yaubada ya faꞌitagu mate tabu laugagayo ni lisidi yai, doga ya ita faheyaya.

²⁹Na fuyana wa fatamalidima agu halulu mate hige ya waiyoꞌo. Bena E fatiꞌoimiu, “Somo lisina yai be sa laufigu?”

³⁰Koniliyesi iyen, Lahai faihona haꞌa sa ofi mulidi yai na maihala doha 3 koloki maimailafi mate E laulauꞌuꞌula egu luma yai te. Yo fede taumoho hudoꞌi ena leli namanamalina nuwanuwagu yai ya obiyo,

³¹na iyen, “Koniliyesi! Yaubada em lauꞌuꞌula haꞌa ya atahi yo tau fagogo gesagesa wa saguhidi hinaga ya itadi.

³²Dodoga hahaisa u fatamalidi ti lau be taumoho hudoꞌi hesana Saimon Pita ana halulu Diyopa nuꞌuna yai. In mate taumana na ena falihesa lisina yai ya miyamiya yo in logena suisui ꞌwapidi tau abiꞌabi nonohaidi. Saimon ena luma mate gabogabo sadaina yai.”

³³Yo fede E fatamalidi sa laowa am halulu na ya loholoho be wa laoma. Aho te mahudoꞌimai ꞌe faꞌoigogoma Yaubada matana yai ꞌe bagibagiyem be ginauli mahudoꞌina Guyau haꞌa ya falibam ema wa liba ꞌe atahi.

³⁴Pita ya liba fatubu na iyen, Aho te E sibai mate Yaubada hige doga laꞌi i ita fasae e i ita fakiu. Wananaha! Ita mahudoꞌida mate gonogonowada.

³⁵Safalumadi edi laulau sa dudulai yo Yaubada sa fafadebasae mate enehena. Fali alina hinaga maꞌeda gonogonowada.

³⁶Yaubada nuwa esega wasana loholohona ya fatamali lawen Isalaela dodogadi lisidi be Yesu Keliso ya libalibaen, haꞌa ami sibai. In mahudoꞌidi edi Guyau!

³⁷Somo sa laulau Diudeya Nuꞌuna mahudoꞌina yai mate haꞌa ami sibaidi. Ya fatubu Galili yai fuyanna Diyon, babasito wasana ya libaen, mulina yai.

³⁸Yaubada, sidohana Nasaleta dogana, Yesu ena fafamohafuna Yaluwa Tabuna yo gigibwali lisidi yai haꞌa ami sibai. Yaubada mate maꞌena na ya lau nuꞌu ouꞌouli yai be loholoho ya lau ginauli yo safalumadi Diyabolo ya fafaheyayadi, mahudoꞌidi ya faloholohodi.

³⁹Ginauli mahudoꞌidi ya ginaulidi Diusi dodogadi edi nuꞌu yai yo Yelusalem nuꞌudi yai ni, haꞌa matamai yai ꞌe itadi. Habahim sa wunui be oyagi yai sa tutu fapatu.