Olcueih 21:1-14

¹Manghai kah a lungbuei tah sokca tui bangla BOEIPA kut dongah om tih, a ngaih bangla boeih la a hoihaeng.

²Longpuei boeih he hlang loh amah mikhmuh nen tah a thuem sak. Tedae BOEIPA long tah lungbuei ni a khiing a lang.

³Duengnah neh tiktamnah saii ham te BOEIPA loh hmueih lakah a ngaih.

⁴Mik dongkah buhuengpomnah neh lungbuei a mungkung he halang rhoek kah tholhnah hmaithoi ni.

⁵Bi haam kah kopoek tah kumkonah la om yoeyah tih, aka cukhat boeih khaw tloelnah la om yoeyah.

⁶A hong ol lamkah bisai neh thakvoh tah honghi la huu tih, dueknah ni kang a toem coeng.

⁷Halang loh a tiktam la saii ham a aal dongah, amamih kah a rhoelrhanah loh amamih a hmuh bitni.

⁸A ko aka boi hlang kah longpuei tah kawn dae, aka cil tah a bisai a thuem pah.

⁹Hohmuhnah la aka om yuu neh hloih aka khueh kah im lakah tah, imphu bangkil ah khosak te then ngai.

¹⁰Halang kah a hinglu long tah boethae a ngaidam tih, a mikhmuh kah a hui te khaw rhen pawh.

¹¹Hmuiyoi loh lai a sah vaengah hlangyoe khaw cueih tih, a cueih hamla a cangbam vaengah mingnah khaw a dang.

¹²Hlang dueng long tah halang imkhui khaw a cangbam mai dae, halang rhoek long tah a thae la a paimaelh.

¹³Tattloel kah a doek te a hna aka buem thil tah, amah a pang van vaengah doo uh mahpawh.

¹⁴A huephael kah kutdoe loh thintoek, a rhang dongkah kapbaih loh kosi aka tlung te a daeh sak.