1 God, yu na main God, en mi wandim yu brabliwei. Holot main filing wandim yu. Main spirit jidan wikwan en mi thestiwan blanga yu, jis laik drai en rabishwan kantri weya wandim woda.
2 Larram mi luk yu deya langa yu seikridwan haus. Larram mi luk hau strongbala en haibala yu jidan.
3 God, blanga yu filing im kipgon laigimbat mi. Im mobedawan langa main laif. Blanga tharran na ai garra preisim yu.
4 Ai garra oldei gibit yu theingks raidap mi dai. Ai garra lidimap main bingga langa yu wen mi prei.
5 Main spirit garra jidan bulap en sedisfaid jis laik aibin dagat detmatj daga. Ai garra sing ola hepiwan song blanga preisim yu.
6 Naitaim wen mi leidan mi oldei jinggabat langa yu, en olnait mi jinggabat langa yu,
7 dumaji yu na bin oldei albumbat mi. Mi sing hepiwan song dumaji mi gudbinji. Mi jidan seifwan garram yu, jis laiga beibiwan jukjuk weya im jidan seifwan andanith langa im mami wing.
8 Mi holdim yu adbala, en yu bingga kipum mi seifwan.
9 Detlot hu oldei trai blanga kilim mi ded garra godan langa det pleis weya ola dedwan pipul jidan.
10 Olabat garra gitkil langa wofait, en ola wailwan dog garra dagadagat olabat bodi.
