Text copied!
Bibles in Kriol

Ola Saam 132:7-17 in Kriol

Help us?

Ola Saam 132:7-17 in Holi Baibul

7 Melabat bin tok, “Kaman! Wi garra go deya langa det Serramoni Pleis blanga YAWEI en wi garra nildan en weship im lida langa im speshalwan tjeya.”
8 YAWEI, kaman en jidan deya langa yu Serramoni Pleis garram det Seikridwan Boks, weya pipul sabi yu pawa oldei jidan.
9 Larram ol detlot serramonimen blanga yu oldei dum wanim rait olataim. Larram ol yu pipul olabat jingat adbala gudbinjiwei.
10 YAWEI, yubin meigim pramis langa yu wekinmen Deibid. Nomo gibit bekboun langa im, det king weya yubin pikimat.
11 Yubin meigim brabli strongwan pramis langa Deibid, en yu garra oldei kipum det pramis. “Ai garra oldei meigim wan san blanga yu femili lain jidan king.
12 If dei jidan trubalawei langa main strongbala pramis, en if dei teiknodis langa wanim ai dalim olabat, wal dei garra kipgon jidan king.”
13 YAWEI bin pikimat Saiyan, en im wandim meigim tharran im kemp.
14 “Iya na ai garra jidan olagijawan, en iya na ai wandim jidan bos.
15 Ai garra gibit Saiyan ebrijing im wandim, en ai garra meigim ola powan pipul sedisfaid garram daga.
16 Ebrijing detlot serramonimen dum ai garra gudbinji langa olabat, en ola pipul garra sing ola song gudbinjiwei.
17 Iya na ai garra meigim wanbala jidan haibala king brom det femili lain blanga Deibid, en im garra jidan laiga lait weya im shain olagija.
Ola Saam 132 in Holi Baibul