1Baguia tëën guial zaꞌ bén na̱j ziꞌc xi xiil Dios guijc dajn ni la Sión. Bén na̱j ziꞌc xi xiil Dios zaꞌman con tibgayuu tiuubitap mil ree bejn, graczi reeman ca lucwaj reeman laj bén na̱j ziꞌc xi xiil Dios në laj xDadaman.
2Abiꞌ biguiejnan tijb naquieꞌ xanyabaa ziꞌc naquieꞌ rüjn zil daꞌt nijs, o ziꞌc rguien rbidxaꞌ guziaaw rejs daꞌt, o ziꞌc chi rusijdx zien ree bejn arp.
3Dxel rool reeman tijb cant cüb delant loj yagxhil lod zojb bén rniabee në loj guidap ree be zaꞌ yagaj në loj ree bengol guin. Ad zileꞌt chu gusiid cant guin, naabzi ree bén tibgayuu tiuubitap mil guin, laa reeman na̱j bén gulaa loj ree bénguidxliuj.
4Abiꞌ laa reeman na̱j ree xinguiaaw ni ad bagaalt béngunaa, gojc reeman naya abiꞌ zinal reeman bén na̱j ziꞌc xi xiil Dios bantëëz guin rejman. Laa reeman na̱j ree bén gulaa loj ree bénguidxliuj abiꞌ ziꞌc guialnazaꞌc yaloj ni rinë bejn loj Dios zian na̱j reeman delant loj Dios në delant loj bén na̱j ziꞌc xi xiil Dios.
5Ad goct basquiee reeman, nayadxuj reeman delant loj Dios.
6Dxel baguian tijb anjl rzujman xanyabaa con tijb ruson ni na̱j par tiblayaa par gugojnman gra ree bén naban loj guidxliuj, xhietëëz diidx rniee reeman, o xhietëëz loj diaa zëëd reeman, o xhietëëz ciuda o nacion zëëd reeman.
7Dxel dád rejs gunee anjl guin rëbaman: ―Gol bidxeb Dios, gol gules xvaloraman, din ma bidxin hor yadëëd ree bejn cwent lojman. Gol gojp daꞌt respejt bén been xanyabaa, guidxliuj në nijsdoo në lod rajch nijs.
8Dxel rëb stijb anjl: ―Ma biajb, ma biajb Babilonia din ziꞌc chi rusüdx tijb bejn stijb bejn, zian ma basquiee ciuda naroob guin gra ree bénguidxliuj guial güün reeman graloj ree nidxuudx, graloj ree dol roꞌ.
9Dxel rejs daꞌt gunee anjl bayon guin rëbaman: ―Bal chu gap daꞌt monstruo guin respejt con xfigurib abiꞌ tiëbaman tia xsenb lucwajman o yaaman,
10bén zii yayal xcasti naroob Dios, zroꞌ daꞌt gudëëdaman laaman casti. Abiꞌ sagdiajman loj bajl ni cayeꞌc azufre delant loj ree xianjl Dios në delant loj bén na̱j ziꞌc xi xiil Dios.
11Ad yuꞌ tëët dxej yayüꞌ bajl guin. Niꞌqui radxe niꞌqui guiaal achet guialraziiladx par ree bén rajp daꞌt respejt monstruo guin con xfigurib, o bén ca ree xsenb.
12Zeel bén na̱j ree xbejn Dios bén ruzoob ree xtiidxaman abiꞌ rliladx reeman Jesucrist, ad rayalt yalenyaꞌ reeman.
13Biguiejn tëën chaꞌ bén ni na lon diizd xanyabaa: ―Bacaa ni ganin lojl: “Diizd yan xiquilbaa ree bén rëjt con guialrliladx Jesucrist.” Dxel rëb xSprijt Dios: “Walican din ma yaziiladx reeman xcwent ree guialzi ni gudëd reeman abiꞌ chinë reeman guialbenzaꞌc reeman.”
14Dxel baguian tijb za̱j naquich abiꞌ loj za̱j guin zojb ziꞌc tijb bejn. Yuꞌ tijb coron or guijcaman abiꞌ yaaman caꞌman tijb hoz ni nadoxh roꞌ.
15Dxel brii stijb anjl lën yadoo abiꞌ rejs daꞌt guneeman bén ni zojb loj za̱j guin rëbaman: ―Badxeꞌ xi hosil, batüüg ree guialnazaꞌc loj guidxliuj din ma gojl reen ma bidxin tiamp ni yadoꞌp reen.
16Abiꞌ bén zojb loj za̱j guin badëëd xi hosaman loj guidxliuj abiꞌ batoꞌpaman guialnazaꞌc loj guidxliuj.
17Dxel brii stijb anjl lën yadoo ni na̱j xanyabaa, caꞌ gajcaman tijb hoz ni nadoxh roꞌ.
18Dxel niz loj altar brii stijb anjl bén rajp guialrniabee par bajl, abiꞌ dád rejs guneenëman bén caꞌ hoz ni nadoxh roꞌ guin, rëbaman lojman: ―Badxeꞌ xi hosil ni nadoxh roꞌ, batüꞌ ree uv ni yuꞌ loj guidxliuj din ma gojl reen ma gojl tiamp ni yadoꞌp reen.
19Dxel badëëd anjl guin xi hosaman loj guidxliuj guin, abiꞌ batoꞌpaman uv guin ree loj guidxliuj. Abiꞌ badxeꞌman uv guin ree lod guixii reen, laan rën guiëb lod yuꞌ xcasti Dios.
20Dxel xijch ciuda guin bixii ree uv guin abiꞌ lën lod bixii ree uv guin birii rejn. Rejn guin bixieꞌn loj guidxliuj ziꞌct choon gayuu kilometro abiꞌ wëꞌpan ziꞌct xt niz roꞌ ree way.
