Ndị Hibru 1

1

2

3

4

5

6

7

8

9

10

11

12

13

¹Ogẹn mbụ, Osolobuẹ gi ụzọ rị ichẹn-ichẹn gwasọnmẹ ndị nẹdi ẹnyi wẹ oku ghahanị ndị-amụma.

²Kanị, ogẹn ịkpazụụnnị, ọ gwaọlẹ ẹnyi oku ghahanị Nwa a. Ịya kẹ Osolobuẹ yechanrịn ihiẹn ile. Ẹka Nwa a nị kẹ Osolobuẹ gha ke ụwa ile lẹ ihiẹn ile rịn'a.

³Ịya kẹ wẹ gi a hụn kẹ ọghọ Osolobuẹ nọ. Ẹnya hụn n'a a hụngụọ Osolobuẹ. O gi oku ẹ hụ hụn nwọn ikẹn hi-ogbe e kwọndọn ụwa ile. Ogẹn o gi chụgụụ ẹjan wẹ gi a chanchanpụ njọ, ọ nọ nọdị alị azụụn ẹka-nni Osolobuẹ, Onyẹ hụn kachanrịn ihiẹn ile ọghọ e nwọn,

⁴makẹni ịya ka ndị mmọn-ozi, ka wẹ ọhụnma-ọhụnma; nọkẹ kẹ ẹfan (nzere) o nwẹ dọn ka nke wẹ.

⁵Ẹghẹẹ; makẹni, elee mmọn-ozi kẹ Osolobuẹ sịtu, “Nwa m kẹ ị wụ; a ghọsịgụọ m tannị n'ị wụ nwa m” mọbụ sịzị, “M k'a wụrụ nẹdi ẹ, ọ wụrụ nwa m.”?

⁶Ogẹn Osolobuẹ gidẹ wẹhẹ Nwa-ibuzọ a hụ imẹ ụwa, ọ sị, “Ndị mmọn-ozi Osolobuẹ ile, fe n'ẹ.”

⁷Nke ndị mmọn-ozi, ihiẹn Osolobuẹ ku wụ nị “Chuku mẹ ndị mmọn-ozi ẹ e hẹnrin ufere; o mẹ ndị idibo ẹ e hẹnrin ọkụn rị e nwunni.”

⁸Kanị, nke Nwa a, ihiẹn Osolobuẹ ku wụ, “Euu, Osolobuẹ! Ukpo ị nọ a kị k'a tọ jẹnrin ejẹn; ezi-omumẹ wụ ọkpọ ị hụn i gi a kị Alị-eze i.

⁹Ihiẹn furuni wụ ihiẹn a sụọnị ị; njọ e ze i ize. Ịya haịn Osolobuẹ—Osolobuẹ i— gi hukpu i udẹn-ịghọghọ, tumẹ i, ye i ọnọdị hụn kachanrịn nke ibe i.”

¹⁰Osolobuẹ sịzị Nwa a, “Di-nwọnni-ẹnyi, ịyụ ke ụwanị ogẹn mbidọn; ẹka ị mẹmẹ igwere lẹ ihiẹn ndị rị n'a.

¹¹Wẹ k'e wiwi, kanị ị k'a rịferi; wẹ k'a fafụ rịkẹ ẹkwa.

¹²I k'a fụma wẹ rịkẹ ẹkwa, wepụ wẹ; gi ọzọ nọkin ẹnya wẹ, kẹ wẹ dọn e yihutọ ẹwuru. Kanị, yụ nwẹn egbehutọkọ; ndụn ị enwọnkọ ọgụgụ.”

¹³Elee mmọn-ozi kẹ Osolobuẹ sịtu, “Nọdị alị ẹka-nni m ebeni, d'e ru mgbe m gigụụ ndị iṅẹnrẹn i mẹmẹ n'i ihiẹn i gi a zọma ụkụ”?

¹⁴Kịnị kẹ ndị mmọn-ozi wụdẹ? Ẹlẹ mmọn ndị e jẹn ozi kẹ wẹ wụ; mmọn ndị Osolobuẹ zihẹ d'a rụn ọrụn makẹ ọrịnịmma ndị jẹnkọ d'e nwọn nzụọfụha?