7 akũ à yã kũ à èe ò à pì: Mↄabunↄ kína Balaki ma sisi Siria bùsun, akũ ma bo ifãboki kpa kpinↄ kĩnaa ma su. À pì mà boarɛ Isarailanↄ kpɛ, mà su mà sa vãni oarɛ Yakubu buri pìnↄnɛ.
8 Mani kɛ dera mà gbɛ̃ kũ Luda dí ń káronↄ káa? Mani kɛ dera mà bo gbɛ̃ kũ Dikiri dí bo ń kpɛronↄ kpɛɛ?
9 Zaa kpi mìsↄ̃ntɛa matɛni ń e, zaa gu lei musu matɛn wɛ́ sińlɛ. Gbɛ̃ pìnↄn kú ńdona, ò ń zĩda dìtɛ ńdona kũ buri pãndenↄ.
10 Yakubu burinↄn dasi lán bùsu'atɛ̃ bà, oni fↄ̃ ò Isarailanↄ naro ò ń lɛ́ dↄ̃ro. Luda tó ma ga gↄ̃ de lán a gbɛ̃nↄ pↄ́ bà, ma lakana gↄ̃ de lán ń pↄ́ bà.
11 Akũ Balaki pìnɛ: N kɛ̀mɛnɛ deran gwee? Ma su kũnwo de ǹ ma ibɛrɛnↄ kámɛnɛ, akũ sa manan n òńnɛ yá?
12 À wèa à pì: Yã kũ Dikiri dàmɛnɛ ma lɛ́nn mani oroo?
13 Balaki pìnɛ: Ǹ mↄ́ ò gɛ́ gu pãndea, gu kũ ĩni ń en. Ǹ ń kámɛnɛ gwe, zaakũ ń kpadomɛ ĩni e, ĩni ń e ń pínkiro.
14 Akũ à gɛ̀ɛ kãao gudãkpãrinↄ buran Pisiga kpi mìsↄ̃ntɛa. À gbagbaki bò gwe mɛ̀n suppla, akũ à sa òḿma pínki kũ zùsaao kũ sãkarooo.
15 Akũ Balamu pìnɛ: Ǹ zɛ n sa'opↄi la, mani gɛ́ mà a le gwe.
16 Akũ Dikiri sù à yã dànɛ a lɛ́n, akũ à pìnɛ: Ǹ ɛra ǹ gɛ́ ǹ Balaki le ǹ onɛ lákũ ma dànnɛ nà.
17 Akũ à ɛ̀ra à gɛ̀ɛ à a lè zɛna a sa'opↄi kũ Mↄabu kínanɛnↄo. Balaki a là à pì: Dikiri pì deramɛɛ?
