13 Balaki pìnɛ: Ǹ mↄ́ ò gɛ́ gu pãndea, gu kũ ĩni ń en. Ǹ ń kámɛnɛ gwe, zaakũ ń kpadomɛ ĩni e, ĩni ń e ń pínkiro.
14 Akũ à gɛ̀ɛ kãao gudãkpãrinↄ buran Pisiga kpi mìsↄ̃ntɛa. À gbagbaki bò gwe mɛ̀n suppla, akũ à sa òḿma pínki kũ zùsaao kũ sãkarooo.
15 Akũ Balamu pìnɛ: Ǹ zɛ n sa'opↄi la, mani gɛ́ mà a le gwe.
16 Akũ Dikiri sù à yã dànɛ a lɛ́n, akũ à pìnɛ: Ǹ ɛra ǹ gɛ́ ǹ Balaki le ǹ onɛ lákũ ma dànnɛ nà.
17 Akũ à ɛ̀ra à gɛ̀ɛ à a lè zɛna a sa'opↄi kũ Mↄabu kínanɛnↄo. Balaki a là à pì: Dikiri pì deramɛɛ?
18 Akũ à yã kũ à èe ò à pì: Zipo nɛ́ Balaki, ǹ sã kpá ǹ ma yã ma!
19 Luda bi bisãsirinlo kũ à gbasa à ɛ́kɛ to, àdi nɛ̀sɛ litɛ lán bisãsiri bàro. Ani gí yã kũ à ò kɛi yá? Ani gí lɛ́ kũ à gbɛ̃̀ńnɛ papai yá?
20 À pìmɛnɛ mà sa mana ońnɛmɛ. À arubarikaa dàńgu, mani fↄ̃ mà gíro.
21 Mádi yã vãni ke e Yakubu burinↄaro, mádi yã'ũmmana ke e Isarailanↄaro. Dikiri ń Luda kú kũńwo, òdi a kíkɛ tↄ́ sɛ́ lei ń tɛ́.
22 Luda ń bↄ́tɛ Misila, ò gbãna vĩ lán zùsɛ̃ntɛ bà.
23 Oni fↄ̃ ò pↄ́ da Yakubu burinↄaro, oni fↄ̃ ò àlesi bɛ̃̀nɛ kpá Isarailanↄnɛro. Zaa gbãra onigↄ̃ o ń yã musu, yã kũ Luda kɛ̀n gwe.
24 Buri pìi dì futɛ lán músuda bà, àdi a zĩda bi lán músusaa bà. Àdi wútɛro ari à gɛ́ pↄ́ kũ à só, ari à gɛ́ pↄ́ kũ à dɛ̀nↄ aru mi.
25 Balaki pìnɛ: Ǹsun ń káro. Ǹsun sa mana ońnɛ sero.
26 Balamu pìnɛ: Mádi onnɛ kũ yã kũ Dikiri dàmɛnɛn mani oroo?
27 Balaki pì Balamunɛ: Ǹ mↄ́ sà, mani gɛ́ kũnwo gu pãnden. Òdigↄ̃ dↄ̃ro tó ani kɛ Ludanɛ ǹ gbɛ̃ pìnↄ kámɛnɛ gwe sà.
