10 Yakubu boriinↄↄ pari lán bùsu'ãatɛ̃ bà, weé fↄ̃ wà Isarailinↄ naro wà ń lɛ́ dↄ̃ro. Luda tó ma gaa gↄ̃ dɛ lán a gbɛ̃nↄ pↄ́ bà, ma yãana gↄ̃ dɛ lán ń pↄ́ bà.
11 Ben Balaki bènɛ: Ń kɛ̀mɛ dian gwee? Ma mↄnyo lɛ ǹ ma ibɛɛnↄ kámɛ, ben sa maaan ń òńnɛↄ́?
12 À wèàla à bè: Yã kɛ̀ Dii dàmɛ ma lɛ́nn mɛ́ oroo?
13 Balaki bènɛ: Ǹ mↄ́ wà gá gu pãndea, guu kɛ̀ nɛ́ ń en. Ǹ ń kámɛ gwe, zaakɛ aↄ̃ kpadoon nɛ́ e, nɛ́ ń e ń píngiro.
14 Ben à gàao gudãkparinↄ guun Pisiga kpii mìsↄ̃ntɛ̃a. À gbãgbãkii bò gwe mɛ̀n swɛɛplaa, ben à saa òḿma píngi kↄ̃n zùswareeo kↄ̃n sãkaroo.
15 Ben Balamu bènɛ: Ǹ zɛ n sa'opↄzi kɛ̀, mɛ́ gá mà à le gwe.
16 Ben Dii mↄ̀ à yã dànɛ à lɛ́n, ben à bènɛ: Ǹ ɛara ǹ gá ǹ Balaki le ǹ onɛ lán má dànnɛ nà.
17 Ben à ɛ̀ara à gàa à à lè zɛna a sa'opↄzi kↄ̃n Mↄabu kínɛnↄo. Balaki à là à bè: Dii bè diamɛ?
18 Ben à yã kɛ̀ à è ò à bè: Zipo nɛ́ Balaki, ǹ swã kpá ǹ ma yã ma!
19 Luda nɛ́ gbɛ̃nteenlo gbasa à ɛgɛɛ to, è nↄ̀sɛ liɛ lán busãnsi bàro. Eé gí yã kɛ̀ à ò kɛziↄ́? Eé gí lɛ́ kɛ̀ à gbɛ̃̀ńnɛ papaziↄ́?
20 À bèmɛ mà sa maaa ońnɛmɛ. À aubarika dàńgu, mɛ́ fↄ̃ mà gíro.
21 Mɛ́ɛ yã zaa ke e Yakubu boriinↄaro, mɛ́ɛ yã'ↄ̃amma ke e Isarailinↄaro. Dii ń Ludaa kúńyo, aↄ̃è à kíkɛ tↄ́ bↄ ń tɛ́.
22 Luda ń bↄ́ɛ Igipiti, aↄ̃ gbãaa vĩ lán zùsɛ̃tɛ bà.
23 Weé fↄ̃ wà pↄ́ da Yakubu boriinↄaro, weé fↄ̃ wà àisi zaaa kpá Isarailinↄziro. Zaa gbã̀a weégae o ń yã musu, kɛ̀ yã kɛ̀ Ludaa kɛ̀n gwe.
