1 Balamu bè Balakinɛ: Ǹ gbãgbãkii bomɛ kɛ̀ mɛ̀n swɛɛplaa, ǹ mↄ́mɛ kↄ̃n zùswareenↄ mɛ̀n swɛɛplaa kↄ̃n sãkaronↄ mɛ̀n swɛɛplaa.
2 Balaki kɛ̀ lán Balamu ònɛ nà, ben aↄ̃ saa ò kↄ̃n zùswareeo kↄ̃n sãkaroo gbãgbãkii pìnↄa píngi.
3 Ben Balamu bènɛ: Ǹ zɛ n sa'opↄzi. Mɛ́ gá mà gwa tó Dii é mↄ́ yã omɛ, mɛ́ yã kɛ̀ eé omɛɛ onnɛ. Ben à gàa à zɛ̀ gu lezĩ gbáagbaaa.
4 Luda mↄ̀ à à lè, ben Balamu bènɛ: Ma gbãgbãkii bò mɛ̀n swɛɛplaa, ben ma saa òḿma píngi kↄ̃n zùswareeo kↄ̃n sãkaroo.
5 Dii yã dànɛ à lɛ́n, ben à bè: Ǹ ɛara ǹ gá ǹ Balaki le ǹ onɛ lán má dànnɛ nà.
6 Ben à ɛ̀ara à gàa à à lè zɛna a sa'opↄzi kↄ̃n Mↄabu kínɛnↄ ń píngi,
7 ben à yã kɛ̀ à è ò à bè: Mↄabunↄ kí Balaki ma sisi Siria bùsun, ben ma bↄ ↄfãntɛ̃bↄɛ kpa kpiiinↄ kiia ma mↄ. À bè mà bↄare Isarailinↄ kpɛɛ, mà mↄ́ mà sa zaaa oare Yakubu borii pìnↄnɛ.
8 Mɛ́ kɛ dia mà gbɛ̃ kɛ̀ Luda e ń károonↄ káa? Mɛ́ kɛ dia mà bↄ gbɛ̃ kɛ̀ Dii e bↄ ń kpɛɛroonↄ kpɛɛɛ?
9 Zaa kpii mìsↄ̃ntɛ̃an mɛ́ɛ ń ee, zaa gulezĩan mɛ́ɛ wɛ́ɛ siińlɛ. Gbɛ̃ pìnↄↄ kú ńdona, aↄ̃ ń zĩnda dìɛ ńdona kↄ̃n bori pãndenↄ.
10 Yakubu boriinↄↄ pari lán bùsu'ãatɛ̃ bà, weé fↄ̃ wà Isarailinↄ naro wà ń lɛ́ dↄ̃ro. Luda tó ma gaa gↄ̃ dɛ lán a gbɛ̃nↄ pↄ́ bà, ma yãana gↄ̃ dɛ lán ń pↄ́ bà.
11 Ben Balaki bènɛ: Ń kɛ̀mɛ dian gwee? Ma mↄnyo lɛ ǹ ma ibɛɛnↄ kámɛ, ben sa maaan ń òńnɛↄ́?
12 À wèàla à bè: Yã kɛ̀ Dii dàmɛ ma lɛ́nn mɛ́ oroo?
