3 Tó wà kãkãki pìnↄ pɛ̀, gbɛ̃nↄ é mↄ́ wà kakↄ̃anzi ń píngi dakↄ̃rɛki kpɛɛlɛa.
4 Tó kãkãki mɛ̀n doon wà pɛ̀, Isaraili bori dↄn'aɛdee kɛ̀ aↄ̃ↄ dɛ kí ũunↄ bé wé mↄ́ wà kakↄ̃anzi.
5 Tó wà kãkãki pìnↄ pɛ̀ sikↄ̃kɛnao, gbɛ̃ kɛ̀ aↄ̃ bùra kú ↄfãntɛ̃bↄɛ kpaanↄ bé wé bùra fɛɛ káaku.
6 Tó wà à gɛ̃̀n plaadee pɛ̀ sikↄ̃kɛnao, gbɛ̃ kɛ̀ aↄ̃ bùra kú sↄↄmɛtɛ kpaanↄ bé wé bùra fɛɛ. Kãkãkipɛna sikↄ̃kɛnao pìn gbɛ̃nↄ dana zɛ́n sèeda ũ.
7 Tó wà yezi wà gbɛ̃nↄ kakↄ̃a, wàgae pɛ́ sikↄ̃kɛna sai.
8 Aruna nɛ́ sa'orinↄ bé wé kãkãki pìnↄ pɛ́. Eégↄ̃ dɛare doka ũ gurↄ píngi, apinↄ kↄ̃n a boriinↄ.
9 Gurↄↄ kɛ̀ a ka a bùsun, tó ée gaa zĩ̀ ká kↄ̃n a ibɛɛ kɛ̀ aↄ̃é gà wà fɛɛaonↄ, àgae kãkãki pìnↄ pɛ́ sikↄ̃kɛnao, lɛ a yã e à dↄ mamↄma Dii a Ludan, mɛ́ a bↄ a ibɛɛ pìnↄ ↄzĩ.
10 Gurↄↄ kɛ̀ ée pↄnnaa kɛɛ sↄ̃, zĩbaan yoo, mↄ dufu gurↄ káaku zĩn yoo, àgae kãkãki pìnↄ pɛ́ a sa'opↄ kɛ̀ wè ká tɛ́n à tɛ́ kũnↄa kↄ̃n a sáabukpana sa'opↄnↄ, a yã é dↄmagu. Mámbe Dii a Luda ũ.
11 Wɛ̃̀ plaade mↄ plaade gurↄ barodee zĩ, tɛ́luguu gò sèeda kutaala,
12 ben Isarailinↄ bùra fɛ̀ɛ Sinai gbáan, aↄ̃ↄe sↄ̃ki kpákpaa ai tɛ́luguu gàa à zɛ̀ Parani gbáan.
13 Aↄ̃ bùra fɛɛna káakun gwe. Aↄ̃ↄ kɛ̀ lán Dii dà Musanɛ à òńnɛ nà.
14 Yuda zĩ̀kpɛɛnↄ bé wà bùra fɛ̀ɛ gãli kↄ̃n gãlio káaku kↄ̃n ń tuutao. Aminadabu nɛ́ Nasↄ̃n ń dↄn'aɛdee ũ.
15 Zua nɛ́ Nɛtanɛlin Isaka zĩ̀kpɛɛnↄ dↄn'aɛdee ũ.
16 Eloni nɛ́ Ɛliabun Zɛbuluni zĩ̀kpɛɛnↄ dↄn'aɛdee ũ.
17 Gɛsↄnu boriinↄ kↄ̃n Mɛrari boriinↄ kutaa pì gbòro, ben aↄ̃ↄ sɛ̀ wà dào zɛ́n.
18 Ben Rubɛni zĩ̀kpɛɛnↄ bùra fɛ̀ɛ gãli kↄ̃n gãlio kↄ̃n ń tuutao. Sedeu nɛ́ Ɛlizun ń dↄn'aɛdee ũ.
19 Zurisadai nɛ́ Selumiɛlin Simɛↄ zĩ̀kpɛɛnↄ dↄn'aɛdee ũ.
20 Dɛwɛli nɛ́ Ɛliasafan Gada zĩ̀kpɛɛnↄ dↄn'aɛdee ũ.
21 Ben Koa boriinↄ Luda pↄ́nↄ sɛ̀ wà dào zɛ́n. Wà kutaa pì dↄ̀ ai aↄ̃gↄ̃ ká.
22 Ben Ɛflaimu zĩ̀kpɛɛnↄ bùra fɛ̀ɛ gãli kↄ̃n gãlio kↄ̃n ń tuutao. Amiudu nɛ́ Ɛlisaman ń dↄn'aɛdee ũ.
23 Pedazu nɛ́ Gamaliɛlin Manase zĩ̀kpɛɛnↄ dↄn'aɛdee ũ.
