19 Zurisadai nɛ́ Selumiɛlin Simɛↄ zĩ̀kpɛɛnↄ dↄn'aɛdee ũ.
20 Dɛwɛli nɛ́ Ɛliasafan Gada zĩ̀kpɛɛnↄ dↄn'aɛdee ũ.
21 Ben Koa boriinↄ Luda pↄ́nↄ sɛ̀ wà dào zɛ́n. Wà kutaa pì dↄ̀ ai aↄ̃gↄ̃ ká.
22 Ben Ɛflaimu zĩ̀kpɛɛnↄ bùra fɛ̀ɛ gãli kↄ̃n gãlio kↄ̃n ń tuutao. Amiudu nɛ́ Ɛlisaman ń dↄn'aɛdee ũ.
23 Pedazu nɛ́ Gamaliɛlin Manase zĩ̀kpɛɛnↄ dↄn'aɛdee ũ.
24 Gideoni nɛ́ Abidãn Bɛyãmi zĩ̀kpɛɛnↄ dↄn'aɛdee ũ.
25 Ben Dani zĩ̀kpɛɛnↄ bùra fɛ̀ɛ gãli kↄ̃n gãlio kↄ̃n ń tuutao. Aↄ̃mbe aↄ̃ègↄ̃ tɛ́ kpɛɛ. Amisadai nɛ́ Ayɛzan aↄ̃ dↄn'aɛdee ũ.
26 Ɔkↄrana nɛ́ Pagiɛlin Asa zĩ̀kpɛɛnↄ dↄn'aɛdee ũ.
27 Enana nɛ́ Airan Nafatali zĩ̀kpɛɛnↄ dↄn'aɛdee ũ.
28 Lán Isarailinↄ è bùra fɛɛfɛɛ wàgↄ̃ tɛ́tɛkↄ̃zi nàn gwe gãli kↄ̃n gãlio.
29 Obabun Musa anzure Ruɛli nɛ́ ũ, Midiã boriimɛ. Musa bènɛ: Wée daa zɛ́n gana bùsu kɛ̀ Dii bè é wa gbaan. Ǹ mↄ́ ǹ gáwao, wé yã maaa kɛnnɛ, zaakɛ Dii nnamana gwe lɛ́ gbɛ̃̀we.
30 Ben à bènɛ: Mɛ́ gáro, mɛ́ ɛara ma bùsun ma bɛdeenↄ kiiamɛ.
31 Musa bè: N yã nna. Ǹton wa tónlo, zaakɛ ń bùrakaɛki maaa dↄ̃ bensↄ̃ ḿbe nɛ́ kɛ wa wɛ́ɛdee ũ.
32 Tó n gaawao, wé yã maaa kɛ̀ Dii é kɛwee kɛnnɛ se.
33 Isarailinↄ bùra fɛ̀ɛ Dii kpiii saɛ aↄ̃ táa ò gurↄ aagↄ̃. Wà dↄ̀ aɛ kↄ̃n Dii bà kuunańyo àkpatio lɛ à bùrakaɛkii ↄdↄańnɛ.
34 Tó aↄ̃ fɛ̀ɛ wà dà zɛ́n, Dii tɛ́luguu pì ègↄ̃ kúńla fãantɛ̃.
35 Tó wà dà zɛ́n kↄ̃n àkpatio, Musa è be: Ǹ fɛɛ Dii, lɛ n ibɛɛnↄ fãakↄ̃a, lɛ n zangurinↄ bàa lɛ́nnɛ.
