10 Wal det graun bin opinap en julurum olabat en olabat bin dai garram Kora en im wekinmen olabat wen det faiya bin binijimap 250 men. Tharran na bin jidan woning blanga detlot Isreil pipul.
11 Bat detlot san blanga Kora nomo bin gitkil.
12 Wal 22,200 men bin brom det klen blanga Simiyan. Olabat bin kamat brom detlot femili grup blanga Nemyuwel, Jeimin, Jeikin, Sera en Shaul.
15 Wal 40,500 men bin brom det klen blanga Ged. Olabat bin kamat brom detlot femili grup blanga Sefan, Heigai, Shunai, Osni, Irai, Erod en Erilai.
19 Wal 76,500 men bin brom det klen blanga Juda. Olabat bin kamat brom detlot femili grup blanga Shela, Peres, Sera, Hesran en Heimul. Dubala san blanga Juda, Yura en Onan bin dai langa det kantri gulum Keinan.
23 Wal 64,300 men bin brom det klen blanga Isaka. Olabat bin kamat brom detlot femili grup blanga Tola, Puwa, Jeishab en Shimran.
26 Wal 60,500 men bin brom det klen blanga Sebyulan. Olabat bin kamat brom detlot femili grup blanga Sered, Ilan en Jaliyel.
28 Wal 52,700 men bin brom det klen blanga Manesa, hubin det san blanga Josef. Olabat bin kamat brom ol dislot femili grup na. Manesa bin abum wanbala san neim Mekiya en imbin dedi blanga Giliyad. Detlot femili blanga Giliyad bin Aiyesa, Helek, Esriyel, Shekam, Shemida en Hefa. Selafad bin det san blanga Hefa, bat im nomo bin abum eni san, oni ola doda. Olabat neim bin Mala, Nowa, Hogla, Milka en Taisa.
35 Wal 32,500 men bin brom det klen blanga Ifreiyim, det san blanga Josef. Olabat bin kamat brom detlot femili grup blanga Shuthela, Beka en Teihan. Det femili grup blanga Iran bin kamat brom Shuthela.
38 Wal 45,600 men bin brom det klen blanga Benjamin. Olabat bin kamat brom detlot femili grup blanga Bela, Eshbel, Ahiram, Shefufam en Hufam. Det dubala femili blanga Ard en Neiman, olabat bin kaman brom Bela.
42 Wal 64,400 men bin brom det klen blanga Den. Olabat bin kamat brom det femili grup blanga Shulam.
44 Wal 53,400 men bin brom det klen blanga Esha. Olabat bin kamat brom detlot femili grup blanga Imna, Ishbai en Beraiya. Det dubala femili grup blanga Hiba en Melkiyel bin kamat brom Beraiya. En Esha bin abum doda neim Sera.
48 Wal 45,400 men bin brom det klen blanga Neftali. Olabat bin kamat brom detlot femili grup blanga Jasiyel, Gunai, Jesa en Shilam.
51 Wal det namba blanga ola Isreil men bin 601,730.
52 Brom deya YAWEI bin dalim Mosis,
53 “Bambai na wen yu kamat langa det kantri yu garra kadimat ola kantri blanga ola klen. Yu garra gibit lilbit kantri langa lilwan klen, en loda kantri langa bigwan klen.
54 Blanga kadimat ola kantri, yu garra tjakambat detlot speshalwan ston, en yu garra gibit ol detlot bigis pat langa detlot klen hu jidan blendibala pipul, en yu garra gibit ol detlot lilbit pat langa detlot klen hu jidan lilbit pipul.” Lagijat na YAWEI bin tok.
57 Wal dijan na blanga det klen en ola femili grup blanga Libai. Libai bin abum thribala san neim Geshan, Kohath en Merarai.
58 Olabat bigininimob bin Libnai, Hebran, Malai, Mushai en Kora. Kohath bin det dediwan blanga Emrem.
59 Emrem bin merrit langa Libai doda neim Jokabed, hubin bon langa Ijip. Emrem bin abum dubala san neim Eran en Mosis en wan doda neim Miriyam.
60 Eran bin abum fobala san, en olabat neim bin Neideb, Abaihu, Eliyeisa en Ithama.
61 Neideb en Abaihu bin dai wen dubala bin gibit det nogudbala faiya langa YAWEI.
