Namba 14:26-39

²⁶Iahova viteni min Mosis ka Eron vit,

²⁷“?Meatin keil ekek isel kutut kat nau hetokol nengeis? !Inau naraengon selkututien keil one vinvin!

²⁸Milhehit mesein selusien enek min keil milhehit, ‘Navat kati hehi anatin, tounah vasi koa tisa koa lises mimul mivit namumoni min kami, kei varei numoni hemai hehi anatin. Inau Iahova naselus.

²⁹Kami vasi mihematmat ka teiai keil onami il retai en out volvol ekek. Anatin, kami koa misel kutut kat nau, koa sua onami mulin hanumau (20),

³⁰mihervatei mun en atan en out enek. Anatin keke navat kati nisani min kami, ka mihervatei ien. Kelep enges keilu Sosua luheha en out enek.

³¹Kami mivit meatin keil ten out enek ihuli kat titiali onami keil. Ka inau nikur titiali onami keil iha keke umon teim se en atan koa kami milei seseini.

³²Ka kami, mihematmat en out volvol ekek.

³³Titami keil iles ual tetoun en out volvol ekek sua hehi hanumau elu (40). Ka ven mirvitei anatin minau, keil ilong mahien hetokol avong koa kami vasi mihematmat.

³⁴Mihean hei tisaen onami sua hehi hanumau elu (40), sua tai ten avong keil koa avi hanumau elu (40) koa meatin onom keil alei vasin out enek. Miheilea inau suk ka vati vurohien onak.

³⁵Navat kati keih keke numon tounah ekek min kami, meatin tisa keil koa mimai en rendemien tas va kat inau. Sakini, en out volvol ekek, kami vasi mihematmat. Anatin eli, inau Iahova namul naselus.’”

³⁶Evus, koakeil Mosis rie lat keil keke avaha avalei suain atan enek, koakeil vasi umai ris ka asan selusien tisa va kat atan enek,

³⁷Sakini, Ahi sakin mari mesaien tai mai ka muas keil umat.

³⁸Ka, en meatin taleisuaien keil koa uva en atan enek, Sosua (natin Nun) keilu Kelep (natin Sepuneh) enges lumoul.

³⁹Navong Mosis vit mesein selusien onen Iahova min me-Isrel keil, keil vasi amurang ka amurang.