Na Livu 7

1

2

3

4

5

6

7

8

9

10

11

12

13

14

15

16

17

18

19

20

21

22

¹Mi murina keri, inau tu righira ra vati na angel tara tughuru tana vati na piuna na maramana, tara tabe betoi ara vati na mata ni ghuri tara lovulovu mai tana pari mana tahi, mana lei ghai.

²Ma God te vahera na maana ge kara dikalai na pari mana tahi. Keri ge inau tu righia sakai na angel keha te va mai tana bona na aho te sogha dato, te holaa nina lagholagho God te vola. Ma gaia te nia ghaeghahe nia na manga sule vanira gaira e vati na angel,

³“Pitu! Bei taghalaghinia gea mua na pari, mana tahi, mana lei ghai, polo kai talui nina vaughilala God tana sopa raedira nina lei tinoni lutu.

⁴Inau tu rongovira e ngiha na vure gaira tara talu vaughilaladira nia nina vaughilala God. Gaira tara kaekage sakai hangalatu vati hangavulu vati na togha (144,000) tara talu vaughilaladira tana lei kema ni Israel:

⁵Tana kemana Judah hangavulu erua na togha (12,000), Tana kemana Reuben hangavulu erua na togha (12,000), Tana kemana Gad hangavulu erua na togha (12,000),

⁶Tana kemana Asher hangavulu erua na togha (12,000), Tana kemana Naphtali hangavulu erua na togha (12,000), Tana kemana Manasseh hangavulu erua na togha (12,000),

⁷Tana kemana Simeon hangavulu erua na togha (12,000), Tana kemana Levi hangavulu erua na togha (12,000), Tana kemana Issachar hangavulu erua na togha (12,000),

⁸Tana kemana Zebulun hangavulu erua na togha (12,000), Tana kemana Joseph hangavulu erua na togha (12,000), Tana kemana Benjamin hangavulu erua na togha (12,000).

⁹Mi murina keri, inau tu righira na vure subo, te vahola ngangata na idumiadira. Na vure rakiri tara mai tana lei komu udolu, tana lei kema, mi tana lei leu soko tana maramana, mara tughuru inaghona na malei sopou ni vunaghi haba, maia na Dale Sheep. Gaira tara nighi pupulu na tivi pura, mara tabei na ghaba ni niuniu.

¹⁰Ma gaira tara nia ghaeghahe na manga sule, “Dida na God ivuvungana na malei sopou ni vunaghi haba, mana Dale Sheep, toro vavolaghita!”

¹¹Ma gaira na lei angel udolu tara tughuru talighutia na malei sopou ni vunaghi haba, ma gaira lei mane nagho, mara vati na totobo vola ghua. Ma gaira tara poghotao horu kikinima inaghona na malei sopou ni vunaghi haba, mara holohabaa God.

¹²Mara bosa, “Eo ke ghaghua igaa! Na vauto, na rongoragha, mana manaha, na holouto, na kikinima, na maana mana lagavule nina dida na God ke va me vaa. Amen!”

¹³Ma sakai tadira erua hangavulu vati na mane nagho te huatiu, “?Ahei gaira tara pupulu pura raini, mi vei tara va butu mai?”

¹⁴Mi nau tu bosa tughu vania, “Mane Nagho, ighoe to ghilalaa.” Ge bosa vaniu, “Agaira raini tara tughuru ngasi tana taluutuni tana bona ni gunaguna sule. Ma gaira tara apoi didira pupulu tana ghabuna na Dale Sheep, me va marabui.

¹⁵Mana pukuna keri, tara tughuru inaghona nina malei sopou God, mara gehegehe vania tana bongi mana dani, lokana nina Valetabu. Ma gaia te sopou vuvungana na malei sopou ni vunaghi haba ke kabu ighobudira, me righitaonira.

¹⁶Ma gaira kara mua vitolo, ma kara mua ghoi mamangaha ghua. Mana aho mana na lei totobo te papara kara mua vahaghitailira,

¹⁷na pukuna na Dale Sheep te tughuru inaghona na malei sopou ni vunaghi haba, ke righitaonira te vagha na puku ni vatogha sheep. Agaia ke hulira va tana lei beti vuravura te vola. Ma God ke ghudurikehai na lei kolobu ni matadira.