1Yakobo kawatanga wanage na kalonga, “Iduganyeni hamwe, na nizamulongelani yaja yondayamulawilileni siku zikwiza.”
2“Izoni hamwe na mutegeleze, wana wa Yakobo. Munitegeleze tati yenu Isilaili.”
3“Lubeni, chaudele wangu, nguvu yangu Na mwana wa mwanduso wa ubwanga wangu, Mwene udahi na nguvu.”
4Weye fana viya mazi yamemile, Mbali hwizakuwa wa mwanduso kaidi bule, Kwaviya kugona muna dikomwa jangu na kumbandama mtumwa wangu, yalingile fana muke wengu hudihishimu komwa da tati yako.
5“Simeoni na Lawi ni ndugu. Wosang'hanila silaha zawo kutenda usede.
6Mbali niye sizaihanganya muna uwihi wawo, Sizaihanganya na mting'hano wawo, Kwaviya muna uludoko lwawo wamkoma munhu, Chiutundu wawo wakanha umuge wa ng'ombe.
7Noduwila ludoko lwawo kwaviya lukali ng'hani, Na muna ing'hasiliki yawo, kwaviya ni usede. Nizawagola muna iisi ya Yakobo. Nizawapwililisa muna iisi ya Isilaili.”
8“Yuda, wana wa tati yako wezakutogola. Wehi wako kwizawanyoda singo. Wana wa tati yako wezatumbala mavindi haulongozi hako.
9Yuda mwanangu, kulinga fana simba, yoyapatile maingo yake na kabwela ukaye, Fana simba koigolola na kugona hasi, simba yeli na ludabwa yelihi yoyodaha kumulamusa?
10Yuda kezakwamha mhome ya chifalume, Welesi wake wizatawala siku zose. Mbaka vondayeze yeli na udahi wa ufalume Mbaka makabila wezamtegeleza.
11Komfunga chihongwe wake kwa nzabi muna umbiki wa zabibu na komfunga mwanachihongwe kwa nzabi muna umbiki wa zabibu unogile, muladi yaje mayani ya mzabibu. Kofuwa viwalo vake muna idivai, Viwalo vake muna idivai ndung'hu.
12Meso yake yawe na madung'hu fana divai na meno yake yawe mazelu fana matombo.”
13“Zabuloni kezakala habehi na bahali. Kezasigamiza meli yake muna ingema Mbaka yake izahakana na Sidoni.”
14Isakali kalinga fana chihongwe mwene nguvu, Yoyoigoneza hagati ya zimbahasha zake.
15Mbali kowona kuwa hanhu ha kuhumula hanoga, Na kuwa isi iviya ni ya kunogeza. Konamiza mgongo wake kupapa mbahasha, Na kowangilizigwa kusang'hana usang'hano fana mtumwa.
16Dani kezakuwa msemi kwa wanhu wake fana imwe ng'holo za makabila ya Isilaili.
17Dani kezakuwa nyoka muna inzila, Nyoka yeli na sumu mumgwazo wa nzila, Yoyoluma visigino va vihongwe, Yokwela chihongwe kogwa chingalingali.
18“Mndewa Mulungu niugozela ukombola wako.”
19“Gadi kezatowigwa na mabeduwi, Mbali yeye kezawasondelela kuchisogo na kuwatowa.”
20“Isi ya Asheli izalava ndiya ya inogile. Nayo kezalava ndiya yoimfaya mfalume.”
21Nafutali fana viya mbuguma ya mhala, yoyokweleka wana wanogile.
22“Yosefu ni fana mbiki ukwima, mbiki ukwima mwiingema ya nzasa, matambi yake yatanda muna inhumba.
23Watowa misale wamtowa ng'hani Na wampigisila misale na wamgaza ng'hani.
24Mbali upinde wake ung'hali ugangamala Makono yake yana udahi, Kwa udahi wa Mndewa Mulungu wa Yakobo, Mdimi na luwe lwa Isilaili.
25Kwa Mulungu wa tati yako yondayakutaze Kwa Mulungu mwene Udaho yondayakutemele mate Yakutemele mate kwa mvula kulawa kuchanyha Kutemiligwa mate mazi yoyolawa hasi mwiisi, Kutemiligwa mate kweleka wana na fugo,
26Kutemeligwa mate kwa tati yako kuhume kutemiligwa mate kwa migongo ya umwaka, Kutemiligwa mate uko kuwe uchanyha ya ditwi da Yosefu, uchanyha ya ditwi jake yeli mkulu kufosa ndugu zake.”
27“Benjamini ni mbwizi mkali. Imitondo koja maingo yake na ichigulogulo kogola viyahokile.”
28Izo niizo ng'holo longo na maidi ya Isilaili, na izo niizo zimbuli ziyawalongele tati yawo iyawatemele mate, fana viya chila munhu viyalondeke.
29Maabaho Yakobo kawalagiliza wanage wa chilume vino, “Lelo niye nohita kwiilumba na wanhu wangu muna ifa, muniwande hamwe na tati zangu muna dituka muna umgunda wa Efiloni Muhiti
30kuja Makipela ulawilo wa zuwa wa Mamule mwiisi ya Kanaani. Bulahimu kagula tuka ijo na mgunda kwa Efiloni Muhiti diwe hanhu hake ha kuwandila.
31Uko niuko kuwawandigwe Bulahimu na muke wake Sala, iviya uko niuko kuwawandigwe Isaka na muke wake Lebeka, iviya uko niuko nimuwandile Leya.
32Mgunda na tuka dili umo viguligwa kulawa kwa Wahiti.”
33Yakobo viyakomeleze kuwalagiliza wanage, kayabweleza magulu yake mdikomwa, na kadanganika kaihanganya na walala wake wowamulongolele.
