14 Jaŋe iŋuc ehuc hehesic bâfuaniŋte maŋzi dâŋ manasu biric eeŋgopieŋ, ehuc doc bapa gie bahuc jueŋgopieŋ.
15 Jaŋe iŋuc eeŋgopieŋte sisipiriczi ututuŋ jaha fisi‐jarerâ bâsirowec‐jopame mocwâc mi juniŋmu.
16 Wofuŋ e eebapa 7 kecʒiŋuc jaŋere maname mamakâcne eha râsi ejareekac: Pepec ʒâŋe fifi, micbipiczi wokemaŋ dâŋ mumu, ŋic bahacmâc qâqâhâmoc‐jopa, dâŋ repicne manasu biric ee, wiac hehesicne ezore fâro hata rara, dâŋgieo domahuc dâŋ muhasickerâ burec ee, erâ âgo ŋondeŋko juhuc iiriac â kikisâ bâbâfua.
20 Motec‐mae, go mamacgere sâcmutâc dâŋ mana rereŋ ehuc juzemec, erâ wâc neŋgocgezi wiac qazu‐garewec irec moc mi nikecguzejec.
21 Go dâŋjekic maŋgao râetec foha paŋʒâic jaha bajuzemec.
22 Ehame hata ira me ira racmurâ jowa qataŋ egarezejec, ehuc ŋafeo ŋezicguzejec â ʒoaŋko wâc baficguzejec.
23 Sâcmutâc dâŋjekiczi lambe iŋucne tamae‐garezejec, â mumutiŋ dâŋjekiczi juju hata biaŋne irec fuŋne gaza mutâc ezejec.
24 Sasec ŋokac jaŋerao qohotazicte me ŋokac gâcne jaŋere wokemaŋ dâŋzi bâdocguzacte jahere dâŋzi hâcne aka sâcne hegareocmu.
25 Ŋokac hawari‐jeŋic biaŋne izi mi woricguzejec, me ʒâŋe rârâqâc honecgupie ririfirerâ mi docke‐jarezemec.
26 Ŋic moc e hata ŋokac nânâ poroŋ mocjaha maczi furine bazo murâ baocmu, mâc boe sau gie bapazi ine juju‐ticne fârine sipiricke‐fâreocmu.
27 Go ʒocmimiŋ hâpohaŋtec ŋaqige akickeocmu me?
28 Me ʒoc kine fainao âtehaŋtec kikege mi ʒaocmu me?
29 Manakic, ŋic moczi ŋic mocte ŋonâŋhec foocmu e irec sâc fuacneocmu. Moc e iŋuc eocmuzi ʒâic manaocmu hâcne.
30 Ŋic moc e nânâre hâmohuc fiuc roocmuo ine ŋic jaŋe manacnepie boc mi sâqoreocmu.
31 Mocjaha, fiuc rohame izia bâfuaniŋmuo ine wiac irec furine râeha arec 7 eocte mucneniŋmu, e wiac focnekac sâc râe‐fâreocmu hâcne.
32 Ŋic moc e boe sau gie baekaczi maŋ mamanasu tâmiric juhuc jahacne juju sipirickeekac.
33 Ŋic e qahuc ʒâŋe biŋe‐ticne bawahapie waha qaqane erâ juocmu.
34 Ŋokacte ŋowezi hâcne ŋic e manauŋkehuc okacne bazucneocte ʒoɋac sâko ehuc moc mi akickeocmu.
35 Ehame furine râcnezo mupie qikiŋneocmu, â wiac izi me izi aaric‐ticne wâc mi bâmâteŋkeocmu.
