Muqâqiŋ Dâŋ 6:14-35

¹⁴Jaŋe iŋuc ehuc hehesic bâfuaniŋte maŋzi dâŋ manasu biric eeŋgopieŋ, ehuc doc bapa gie bahuc jueŋgopieŋ.

¹⁵Jaŋe iŋuc eeŋgopieŋte sisipiriczi ututuŋ jaha fisi‐jarerâ bâsirowec‐jopame mocwâc mi juniŋmu.

¹⁶Wofuŋ e eebapa 7 kecʒiŋuc jaŋere maname mamakâcne eha râsi ejareekac: Pepec ʒâŋe fifi, micbipiczi wokemaŋ dâŋ mumu, ŋic bahacmâc qâqâhâmoc‐jopa, dâŋ repicne manasu biric ee, wiac hehesicne ezore fâro hata rara, dâŋgieo domahuc dâŋ muhasickerâ burec ee, erâ âgo ŋondeŋko juhuc iiriac â kikisâ bâbâfua.

²⁰Motec‐mae, go mamacgere sâcmutâc dâŋ mana rereŋ ehuc juzemec, erâ wâc neŋgocgezi wiac qazu‐garewec irec moc mi nikecguzejec.

²¹Go dâŋjekic maŋgao râetec foha paŋʒâic jaha bajuzemec.

²²Ehame hata ira me ira racmurâ jowa qataŋ egarezejec, ehuc ŋafeo ŋezicguzejec â ʒoaŋko wâc baficguzejec.

²³Sâcmutâc dâŋjekiczi lambe iŋucne tamae‐garezejec, â mumutiŋ dâŋjekiczi juju hata biaŋne irec fuŋne gaza mutâc ezejec.

²⁴Sasec ŋokac jaŋerao qohotazicte me ŋokac gâcne jaŋere wokemaŋ dâŋzi bâdocguzacte jahere dâŋzi hâcne aka sâcne hegareocmu.

²⁵Ŋokac hawari‐jeŋic biaŋne izi mi woricguzejec, me ʒâŋe rârâqâc honecgupie ririfirerâ mi docke‐jarezemec.

²⁶Ŋic moc e hata ŋokac nânâ poroŋ mocjaha maczi furine bazo murâ baocmu, mâc boe sau gie bapazi ine juju‐ticne fârine sipiricke‐fâreocmu.

²⁷Go ʒocmimiŋ hâpohaŋtec ŋaqige akickeocmu me?

²⁸Me ʒoc kine fainao âtehaŋtec kikege mi ʒaocmu me?

²⁹Manakic, ŋic moczi ŋic mocte ŋonâŋhec foocmu e irec sâc fuacneocmu. Moc e iŋuc eocmuzi ʒâic manaocmu hâcne.

³⁰Ŋic moc e nânâre hâmohuc fiuc roocmuo ine ŋic jaŋe manacnepie boc mi sâqoreocmu.

³¹Mocjaha, fiuc rohame izia bâfuaniŋmuo ine wiac irec furine râeha arec 7 eocte mucneniŋmu, e wiac focnekac sâc râe‐fâreocmu hâcne.

³²Ŋic moc e boe sau gie baekaczi maŋ mamanasu tâmiric juhuc jahacne juju sipirickeekac.

³³Ŋic e qahuc ʒâŋe biŋe‐ticne bawahapie waha qaqane erâ juocmu.

³⁴Ŋokacte ŋowezi hâcne ŋic e manauŋkehuc okacne bazucneocte ʒoɋac sâko ehuc moc mi akickeocmu.

³⁵Ehame furine râcnezo mupie qikiŋneocmu, â wiac izi me izi aaric‐ticne wâc mi bâmâteŋkeocmu.