7 Go mamanagere manatec fefene boc mi ezejec, ehuc wiac hehesicne râpeckehuc Wofuŋ mocjaha araŋ bacnezemec.
8 Go iŋuc ecmuo ine izi hâcne nârâ bibiaŋ irec sâc egareha wicge somieocmu â ʒâicge wâc mâteŋkeocmu.
9 Giegaŋgao nânâ monʒaŋ wiac fuaekac sâc irecnec biaŋne gâcne rorâ bâzi rikehuc Wofuŋ muac baafec ecnezemec.
10 Go iŋuc ecmuo ine nânâficgezi fufusuc jaha foocmu, â waiŋ giegao mazuc mâriri fuame ficge hefusetec tiwâne foocmu.
11 Motec‐mae, Wofuŋzi bâtiŋgume manatec wawahane mi ezejec.
12 Wofuŋ e ŋic moc jauŋkezo murâ ba bâtiŋ ecneekac; e mamac moczi ŋokâ‐ticne qa bâtiŋ ecneekac irec sâc eekac hâcne.
13 Ŋic moc maŋɋârâŋ â mamana tarahec juekac ere manape ʒerine ekac.
14 Wiac izi hâcne siliwa â gol jahere sâc sirickehuc wiac furi sâko jâmbâŋ ekac.
15 Maŋɋârâŋzi qânâ furi sâko irec sâc wâc jâurukac, â wiac i me i bajuzo muekic izi irec wahamicne.
16 Maŋɋârâŋzi juju dameŋge bâʒoraocmu, ehuc moneŋ mafa â ʒâŋe biŋe wâc bâfua‐gareocmu.
17 Maŋɋârâŋhec juocmuzi bubiaŋ â wama faio juocmu.
18 Maŋɋârâŋhec juniŋmu jaŋe juhâc qâhâmoniŋmu, ehame izi hâcne juju fârine bâfua‐jareocmu.
19 Wofuŋ e maŋɋârâŋhec jukacte mâreŋte hobeteŋ râewec, â mamana tara focnekacte qânikiŋ qaratiewec fokac.
20 E maŋɋârâŋheczi mume opâ jaŋe fisieŋgopieŋ, â karoraczi opâ hoŋkeme mâreŋko hoe wahaekac.
21 Motec‐mae, go maŋɋârâŋ â mamana tarage soŋaŋkehuc juhaŋtec moc mi sifucke‐garezejec.
22 Wiac izi hâcne juju biaŋ â jujuhâmo bâfua‐gareocmu.
23 Go iŋuc ecmuo ine hatagao sâcne racmu â kikege wâc mi fâfâcguocmu.
24 Go wiac irec me irec mi hâwicguha waha guŋ biaŋne fohaŋtec hae fureocmu.
25 Ŋic sindaŋne jaŋere wiac hâhâwicnezi mâŋâŋ ɋicwânʒâŋnehec iŋucne fisiekac, irec sâc jaha ututuŋ fisi‐garezacte mana mezac mi ecmu.
26 Wofuŋzi hone soŋaŋ egareha sâcne jucmu, eki hâcne wiwiticko fezicte kikege sapeckeocmu.
27 Go tâpiri fogarekac sâc ŋic qarâ suriŋne jaŋe ehâmo‐jarezemec.
28 Go miŋecgac jaha ŋic âgoge bafickezo manasukicko tomâckore biŋe mi râetec fozejec.
29 Me ŋic âgoge moc gorao roweckehuc maŋfuŋgao juekac e râsi ecnehuc wiac sâqocne moc mi ecnezemec.
30 Ŋic moczi wiac hehesicne i me i mi egareha fuŋne tâmiricko ehec dâŋ mu qaqatarac mi ezepirec.
31 Ŋic ʒâʒâicne tâpiri‐jeŋicte iiŋguuŋ mi ejarezemec, ehuc jaŋe wiac eeŋgopieŋ irec sâc jaha mi ezemec.
32 Wofuŋzi ŋic hehesicne jaŋe hâcne qaisoc‐jopaekac â ŋic tiŋne jaŋe ine âgo ejareekac.
33 E ŋic sindaŋne jaŋere fic hae sâweckeekac â ŋic tiŋne jaŋere ine jambuŋkeekac.
