MUKÉTÍMÙ 23:4-24 in Ditammari

⁴ Kɛ̀ Kuyie nkɔtɛní o borɛ̀ kòo kù nɑ̀kɛ́ kɛ dɔ̀: M mɑɑ́ yɛwũɔ̃tɔ̀rɛ̀ yɛ̀yiekɛ̀ ndi kɛ fèútɛ́ bɑ́ dìì ĩ́nkɛ̀ dinɑɑdɑɑ̀ nɛ̀ dipedɑɑ̀ kɛ tùɔ.

⁵ Kɛ̀ ti Yiɛ̀ nKuyie nhò nɑ̀kɛ́ tinɑ́ɑǹtì ò bií yóó nɑ́kɛ́ tì Bɑdɑki, kɛ́deè kóò nɑ̀kɛ́ kɛ dɔ̀: Wɛ̃tɛ kɛ́nɑ́kɛ́ Bɑdɑki kɛ dɔ̀ muu.

⁶ Kɛ̀ Bɑdɑmmuu wɛ̃too Bɑdɑki borɛ̀ o cómmú dɛ̀ o wũɔ̃ ò fìé ì kɛ tùɔ nyi borɛ̀, wenwe nɛ̀ Mɔɑbu kó bɛkótíbɛ̀ bɛmɔu.

⁷ Mɛm̀mɛ Bɑdɑmmu dèntɛ̀mɛ̀ o onnìfɛ̀ kɛ dɔ̀: Bɑdɑki duɔ́ nkɛ̀ bɛ̀ n yuní Arɑmu tenkɛ̀ wenwe Mɔɑbu kpɑ̀ɑ̀tì ò duɔ́ nkɛ̀ bɛ̀ n yuní diyiè yìɛ̀ní kɛ̀ɛ̀ bíɛ́kɛ̀ kó yɛtɑ̃rɛ̀ ĩ́nkɛ̀, Ò tu n kɔtɛní kóò bɔntɛ́ kusĩ̀nkù nku Sɑkɔbu yɑɑ̀bí, kɛ tú nhò cɑ̀ɑ̀rɛ̀ Isidɑyɛɛribɛ.

⁸ N nɛ́ bo yĩ́mɛ kɛ́bɔntɛ́ kusĩ̀nkù Kuyie nyí bɔntɛ́ bɛ̀ kusĩ̀nkù? M bo yĩ́mɛ kɛ̀ m miɛkɛɛ pɛikɛ ti Yiɛ̀ nKuyie mmiɛkɛ í pɛikɛ bɛ̀?

⁹ N wúónní Isidɑyɛɛribɛ yɛtɑ̃rɛ̀ ĩ́nkɛ̀ m bɛ̀ pɑɑtɛ́ní ditennì ĩ́nkɛ̀ nkɛ bɛ̀ tu kubotí kùù cɑ̃̀ɑ̃́ nkù nku bɛ̀ í wɛ̃nnɛ́ ibotí tɛì.

¹⁰ We mbo nɑ kɛ́ bɛ̀ kɑ̀ɑ? Bɛ yɑɑ̀bí dònnɛ̀ mubirímú mmu. We mbo nɑ kɛ́kɑɑ nyIsidɑyɛɛribɛ kó dikéè kɛ́nɑ́kɛ́ bɛ̀ mɑ̀mɛ̀? N dɔ́ kɛ́wɛ̃nnɛ́nɛ̀ dɛ kó bɛnitisɑ̀ɑ̀bɛ̀ mbɛ kɛ́kú. N dɔ́ n fòmmu mɑ̀nku ndònnɛ̀ bɛ kɔ̃mu kɔku nku.

¹¹ Kɛ̀ Bɑdɑkii nɑ́kɛ́ Bɑdɑmmu kɛ dɔ̀: A n dɔ̀ɔ̀ bɑ? N dɑ yùní kɑ̀ɑ bo kɔtɛní kɛ́bɔntɛ́ kusĩ̀nkù n dootitɔbɛ̀, kɑ̀ɑ nɛ́ bɛ̀ duɔ̀ mɛsɑ̀ɑ̀nɑ̀ɑ̀?

¹² Kɛ̀ Bɑdɑmmuu ò tɛ̃̀ńnɛ́ kɛ dɔ̀: Ti Yiɛ̀ nKuyie nhɑ̃nnɛ́ tì n nùù n dò nkɛ́ tì mbɛ́i.

¹³ Kɛ̀ Bɑdɑki dɔ̀: Kɔtɛní kɛ̀ ti kɔtɛ kupíkù tɛkù, kɑ̀ɑ bɛ̀ yɑ̀ bɛmɔu, ɑ do yɑ̀ dikéè ndi, dɛborɛ̀ ɑ bo bɛ̀ yɑ̀mu bɛmɔu kɛ́ bɛ̀ nni mbɔntɛ́ kusĩ̀nkù.

¹⁴ Ò mɛ nyĩ kóò kɔ̀tɛnɛ̀ bɛ̀ɛ̀ pɑkɛ́ dihɛì bɛ kó dikɑrì Pisikɑɑ tɑ̃rì yómmɛ̀, kɛ́mɑɑ́ yɛwũɔ̃tɔ̀rɛ̀ yɛ̀yiekɛ̀ kɛ́féútɛ́ bɑ́ dìì wũɔ̃tɔ̀nnì ĩ́nkɛ̀ dinɑɑdɑɑ̀ nɛ̀ dipedɑɑ̀ kɛ́tuɔ.

¹⁵ Kɛ̀ Bɑdɑmmuu nɑ́kɛ́ Bɑdɑki kɛ dɔ̀: Ncómmú diɛ ɑ fìé ìì wũɔ̃ borɛ̀ kɛ̀ n kɔtɛ ciɛ nkɛ́yɑ̀ ti Yiɛ̀ nKuyie nyó n nɑ́kɛ́ tì.

¹⁶ Kɛ̀ ti Yiɛ̀ nKuyie nkɔtɛní Bɑdɑmmu borɛ̀ kɛ́ɑ̃nnɛ́ tinɑ́ɑǹtì ò nùù miɛkɛ kɛ dɔ̀: Wɛ̃too kóò nɑ̀kɛ́ kɛ dɔ̀ muu.

¹⁷ Kɛ̀ Bɑdɑmmu wɛ̃too kɛ́nsɔ̃́ Bɑdɑki bɑɑ cómmú o wũɔ̃ ò fìé ì kɛ tùɔ nyi borɛ̀, wenwe nɛ̀ Mɔɑbu kó bɛkótíbɛ̀ bɛmɔu. Kɛ̀ Bɑdɑkii ò bekɛ dɔ̀: Ti Yiɛ̀ nKuyie ndɑ nɑ̀kɛ́ ɔ̃̀nti?

¹⁸ Kɛ̀ Bɑdɑmmuu deǹtɛ̀ fɛyɛ̀nfɛ̀ kɛ dɔ̀: Bɑdɑki ítɛ́ kɛ́keè. Fɔ̃́ nSipɔɔ birɛ kéntɛ́ kɛ́keè.

¹⁹ Kuyie nyí tú onìtì kɛ bo soutɛ́, kù mɛ nyí do nhonìtì dòmmɛ̀ kɛ bo bɛ́i nkɛ́ceetɛ, kù ɔ̃ɔ̃ í nnɑ̀kɛ́ tìmɑtì kɛ̀ tì í ntùɔ̀kɛní kù bɛ́i ntì kù ɔ̃ɔ̃ tì dɔ̀ɔ̀mu.

²⁰ Kuyie nkuù n nɑ̀kɛ́ kɛ tú m bɛ̀ pɑ̃ mɛsɑ̀ɑ̀, kɛ̀ m mɛ mbɛ̀ pɑ̃, n yí yóó ceetɛ.

²¹ Kù í yɑ̀ Isidɑyɛɛribɛ cɑ̀ɑ̀rɛ̀ mù Kù í yɑ̀ Sɑkɔbu yɑɑ̀bí kó mɛyɛi mmɑmɛ̀, bɛ Yiɛ̀ nKuyie mbɛ̀ bonɛ̀mu, kɛ̀ bɛ̀ kù sɑ̃ntí yɛkpɑ̀ɑ̀tìsɑ̃ɑ̃.

²² Kuyie nkuù bɛ̀ dènnɛní Esibiti kɛ bɛ̀ duɔ́ mmupɑɑnɑ̀ɑ̀wɛ̃rímú.

²³ Dɛnitinɔ̀nkpɛrɛ bɑ́ɑ́ nɑ kɛ́dɔɔ̀ dɛ̀mɑrɛ̀ Sɑkɔbu yɑɑ̀bí. Tidiɛtì kpɛrɛ bɑ́ɑ́ kɑ́ɑ́kɛ́ Isidɑyɛɛribɛ. Dɛɛ̀ te kɛ̀ bɛ̀ ɔ̃ mbɛnkú Isidɑyɛɛribɛ kɛ tú: Ntɛ Kuyie ndɔ̀ɔ̀ dɛ̀ bɛ kpɛ́í.

²⁴ Dɛ kó kubotí ɔ̃ɔ̃ ítɛ́ní musĩ̀mmù kɔ̃mɛ mmɛ bɛ̀ còḿmú dicìrícìrì tɛ̃mɛ̀ mmɛ kɛ̀ bɛ̀ í nìntɛ kɛ pĩ nkɛ cɑ̀ɑ́kɛ́ kɛ yɑ̃̀ mɛyĩ̀ĩ̀ mbɛ̀ ɔ̃ɔ̃ í nduɔ́.