4 Apeli ahowana nlipu no mihuwo cawe cootepa uneneva ni Mwaneene Nluku ahomwakhelela Apeli ni itthuvo cawe.
5 Nanso ayo khayaamwakhelenle Kayini ni itthuvo cawe. Vaavale Kayini ahorusiya ni ahotthuka iyuuci.
6 Vano Mwaneene Nluku ahomwiirela Kayini: Nlattuni we urusiyaka? Untthukelani iyuuci aa?
7 We wapankaka yooreera, khunhala ukupaliya? Nanso waahipankeke yooreera, ucuwele wiira itampi iri wankhora ni inoowipithela. Iyo imphavela wuutthema, nanso we unlamuliya usintta.
8 Wahoolo, Kayini ahomwiirela Apeli nhimaawe: Nrwee umattani. Ukati wakhalacilyaya umattani, Kayini ahontuphela nhimaawe nuumwiiva.
9 Vano Nluku ahonkoha Kayini: Nhimaa Apeli ri vayi? Uyo ahaakhula eeraka: Akincuwela. Mi kihokhala mayonsunka nhimaaka?
10 Vano Nluku ahonkoha eeraka: Ipankilyaa ila isiyani? Ukiviriyane: Ukhuma watthayani, iphome ya munnaa inakhuwela.
11 Vano uholaphiya we ni itthaya ihunle malaku wiira yaakhelele mmatatani mwaa iphome ya munnaa.
12 Ukati unkelaa ulima watthayani, ila khinkela yoovahaka tho icaayira. We unkokhala namatthawatthawa ni nannyatha umwilaponi.
13 Kayini aheerela Apwiya: Uttarusiya waka nwo uhotepa. Nkilevelele.
14 Ilelo nnakoomola mwiilaponi mu, kiwiipithakani ni kitthawatthawaka toko nannyatha, kontha ntthu phi ntthu nohala ukikumanana uyo nokookiiva.
15 Nanso Mwaneene Nluku ahomwaakhula: Khunhala ukhala commo. Ntthu amwiivaka Kayini, nokowiiveleliya ikuhukuhu imaara saapa. Ni Mwaneene Nluku ahomweesera Kayini nthonyero, wiira ntthu phi ntthu nohala unkumanana uyo himwiive.
16 Vano Kayini ahokhuma wamiithoni wa Mwaneene Nluku ni ahorwaa ukhala ilapo yo Nooti, mphantte unkhuma ncuwa wo Eeteni.
