1 Dawidingo Yuda bangec kisiu sufuma kecma mitiyegec yofi heiec. O Anutu, neac Anutuna, ni ge hofocgukecduae, imoc bangec gbangge gbanggeango dokuac ammiande, ni geac ifi isoc anende.
2 Ni kuc nga eweheiheiga hembadeac kicna aratagau fima genai.
3 Geng yoac dedzege amma imoc modackecnec, fakaga imocngo kekec ferahadeac amma dengeregubade.
4 Ifi anu ni kecbadesoc kenecgubade amma geac kpacfu numuma marina miacba enu.
5 Geng ubaongana yakaac kuc nga kerehagoc megume ammina wakeu enacbibicnango sogac sogaiac yegec heiu enacnango ge dengereguude.
6 Ni kecnegeng naso amma tofocnacsoc fefenau fema ge negensiguma geac negensikecma feanduae.
7 Gennoc neac memeficngic, imocac geac kpegangga bageu sogaima kecma yegec heigembade.
8 Ubaongana gearu kpeketaheu marifoigango nanggenunade.
9 Ngicngac kekecna kpetotiebeso andae, yeni ine homec amau kemegecde.
10 Yeni dzikacfu kenggec beangngo feracyunuma kpebucyunuu katekasi yeneng sebingina negecde.
