3 Râsifâc‐nane jaŋe rârâpe wisehuc, fâfâc‐jopame maigao sipirickembiŋ.
4 Goki hâcne dâŋ nane ɋaɋacne i mu fâretiŋ emeŋ, go mumutara tiŋnezi eri ŋeŋegao ŋemeŋ hâcne.
5 Go ŋicne ŋicne hanec‐jopahuc sindaŋŋic bâsirowec‐jopameŋ, ehuc ʒâŋe‐jeŋic bâtâmiretec omatac fuawec.
6 Râsi omae‐fârepie sesuctac fofo sanaŋ fuawec, hae sâko‐jeŋic ŋerawec i wâtuŋne qârisiemeŋ, eme biŋe‐jeŋicte ninikec sanaŋ fuawec.
7 Wofuŋ e ine guriŋ bapa‐ticne dameŋ tâmiric foocmu, mumutara ŋeŋe‐ticne hesanaŋkeweczi qiŋ herâ ŋeocmu.
8 Mâreŋte faio mumutara gie bâtiŋnehuc baocmu, ŋicne ŋicne jaŋere dâŋ sâcjeŋicko mutiŋneocmu.
9 Wofuŋ e keke suec suec ejarekicne jaŋere huec sanaŋ, ro waha âte ejarehapie huec ejareekac.
10 Wofuŋ, ʒâŋege mana maŋ eeŋgopieŋzi gorao roweckeeŋgopieŋ, go wira basac egareeŋgopieŋ jaŋe mi behec‐jopaekic.
11 Wofuŋ Zioŋko ŋec juc eekac e mumuteŋ gae hecneniŋ, gie baekac i ŋicne ŋicne jaŋerao musokaniŋ.
12 E socte kiŋ bataraekaczi manasuc‐jopaekac, qarâ suriŋne jaŋere wiwirare mi nikeckeekac.
13 O Wofuŋ, go aki anonoc enarec, qaisocnueŋgopieŋ jaŋere meo ʒâic bâfuaekopac honec; hâmocte motâckonec bafaharecnuekic hâcne.
14 Eme wiac embiaŋkeekic irec binaŋ bafârezepac, ehuc Zioŋte otâ ere hae ʒoŋao, hone baficgere ʒeri bari ezepac.
15 Qâpuc guru jaŋe jaŋac nombâŋ bâmockembiŋko hutâmirembiŋ, wiwitic soŋsoŋko râembiŋzi kike‐jeŋicko kiwec.
16 Wofuŋ e okacne dâŋ mujarehuc fuŋne‐ticne bataniŋkewec, ŋic sindaŋne eebapa‐jeŋiczi ufic ejareme jowambiŋ.
17 Ŋic sindaŋne jaŋe hâmoc haeo hunʒepieŋ, ŋicguru Anuture ninikec jueŋgopieŋ sasawa jaŋe hâcne.
