Miti Mânec 9:3-17

³Râsifâc‐nane jaŋe rârâpe wisehuc, fâfâc‐jopame maigao sipirickembiŋ.

⁴Goki hâcne dâŋ nane ɋaɋacne i mu fâretiŋ emeŋ, go mumutara tiŋnezi eri ŋeŋegao ŋemeŋ hâcne.

⁵Go ŋicne ŋicne hanec‐jopahuc sindaŋŋic bâsirowec‐jopameŋ, ehuc ʒâŋe‐jeŋic bâtâmiretec omatac fuawec.

⁶Râsi omae‐fârepie sesuctac fofo sanaŋ fuawec, hae sâko‐jeŋic ŋerawec i wâtuŋne qârisiemeŋ, eme biŋe‐jeŋicte ninikec sanaŋ fuawec.

⁷Wofuŋ e ine guriŋ bapa‐ticne dameŋ tâmiric foocmu, mumutara ŋeŋe‐ticne hesanaŋkeweczi qiŋ herâ ŋeocmu.

⁸Mâreŋte faio mumutara gie bâtiŋnehuc baocmu, ŋicne ŋicne jaŋere dâŋ sâcjeŋicko mutiŋneocmu.

⁹Wofuŋ e keke suec suec ejarekicne jaŋere huec sanaŋ, ro waha âte ejarehapie huec ejareekac.

¹⁰Wofuŋ, ʒâŋege mana maŋ eeŋgopieŋzi gorao roweckeeŋgopieŋ, go wira basac egareeŋgopieŋ jaŋe mi behec‐jopaekic.

¹¹Wofuŋ Zioŋko ŋec juc eekac e mumuteŋ gae hecneniŋ, gie baekac i ŋicne ŋicne jaŋerao musokaniŋ.

¹²E socte kiŋ bataraekaczi manasuc‐jopaekac, qarâ suriŋne jaŋere wiwirare mi nikeckeekac.

¹³O Wofuŋ, go aki anonoc enarec, qaisocnueŋgopieŋ jaŋere meo ʒâic bâfuaekopac honec; hâmocte motâckonec bafaharecnuekic hâcne.

¹⁴Eme wiac embiaŋkeekic irec binaŋ bafârezepac, ehuc Zioŋte otâ ere hae ʒoŋao, hone baficgere ʒeri bari ezepac.

¹⁵Qâpuc guru jaŋe jaŋac nombâŋ bâmockembiŋko hutâmirembiŋ, wiwitic soŋsoŋko râembiŋzi kike‐jeŋicko kiwec.

¹⁶Wofuŋ e okacne dâŋ mujarehuc fuŋne‐ticne bataniŋkewec, ŋic sindaŋne eebapa‐jeŋiczi ufic ejareme jowambiŋ.

¹⁷Ŋic sindaŋne jaŋe hâmoc haeo hunʒepieŋ, ŋicguru Anuture ninikec jueŋgopieŋ sasawa jaŋe hâcne.