7 Ŋic moczi e jahacne kiwiric sâcne mi roocmu i! Â juju‐ticnere furi Anutu wâc mi bazucneocmu.
8 Jujure furi i fekicne sâko, roipiehuc juha dameŋ omaeocmu.
9 Irec juju sanaŋ sâcne mi juocmu, â nombâŋ geŋkeocte eipieocmu.
10 Mamanahec jaŋe wâc hâmopie honeocmu, mutucne â kâpâne jaŋe mâmâc siroweniŋmu, ehuc moneŋ mafa‐jeŋic gâcne behe‐jareniŋmu.
11 Jaŋacne ʒâŋezi mâreŋ sâko gâcne wase bambiŋ ŋic iŋucne jaŋe wâc ʒâŋeruŋzi ŋeŋe hae sanaŋ‐jeŋic eocmu, eme ira dameŋne dameŋne fohuc juniŋmu.
12 Ŋiczi juju saricko mi jurahuc juocmu, e qowi siroweeŋgopieŋ jaŋere sâc.
13 Ine mutuc erâ jaŋacne mamanac jueŋgopieŋ, jaŋere hata i hâcne; â wiac fojarekac irec mana biaŋkeeŋgopieŋ, jaŋe iŋucko tara‐jarezokac.
14 Jaŋe lama iŋucne hâmoc haeo râec‐jopazo, eme hâmoczi soŋaŋ‐jeŋic eocmu. Ʒâŋeruŋko hupie sahac hawari‐jeŋic ʒaŋkeocmu, hâmoc haezi ŋeŋe juju‐jeŋic eocmu.
15 Anutuzi ine maŋ qâqâtâc‐nanere kiwiric roocmu, ehuc hâmoc haere tâpirionec bataracnuocmu, eki hâcne no rocnuocmu.
16 Irec ŋic moc e mafa sâkohec eocmuo, â gorewac‐ticnere ʒâŋe biŋe feocmuo, go irec mi mezacguzejec.
17 E hâmohuc wiac moc mi amecke raocmu, â ʒâŋe biŋe‐ticnezi mi bâjâpeocmu.
18 Moc e ɋâricne juhuc juju‐ticnere mana aŋac eocmu, â ɋiɋicne jume gâcnezi wâc muafeckeniŋmu,
19 eme sifu kâcɋenefâc‐ticne jaŋere guruo raocmu, erâ qâtec‐jopahuc tatamac basahuc jaha juocmu.
20 Ŋiczi juju saricko mi jurahuc juocmu, e qowi siroweeŋgopieŋ jaŋere sâc.
