Miti Mânec 49:7-20

⁷Ŋic moczi e jahacne kiwiric sâcne mi roocmu i! Â juju‐ticnere furi Anutu wâc mi bazucneocmu.

⁸Jujure furi i fekicne sâko, roipiehuc juha dameŋ omaeocmu.

⁹Irec juju sanaŋ sâcne mi juocmu, â nombâŋ geŋkeocte eipieocmu.

¹⁰Mamanahec jaŋe wâc hâmopie honeocmu, mutucne â kâpâne jaŋe mâmâc siroweniŋmu, ehuc moneŋ mafa‐jeŋic gâcne behe‐jareniŋmu.

¹¹Jaŋacne ʒâŋezi mâreŋ sâko gâcne wase bambiŋ ŋic iŋucne jaŋe wâc ʒâŋeruŋzi ŋeŋe hae sanaŋ‐jeŋic eocmu, eme ira dameŋne dameŋne fohuc juniŋmu.

¹²Ŋiczi juju saricko mi jurahuc juocmu, e qowi siroweeŋgopieŋ jaŋere sâc.

¹³Ine mutuc erâ jaŋacne mamanac jueŋgopieŋ, jaŋere hata i hâcne; â wiac fojarekac irec mana biaŋkeeŋgopieŋ, jaŋe iŋucko tara‐jarezokac.

¹⁴Jaŋe lama iŋucne hâmoc haeo râec‐jopazo, eme hâmoczi soŋaŋ‐jeŋic eocmu. Ʒâŋeruŋko hupie sahac hawari‐jeŋic ʒaŋkeocmu, hâmoc haezi ŋeŋe juju‐jeŋic eocmu.

¹⁵Anutuzi ine maŋ qâqâtâc‐nanere kiwiric roocmu, ehuc hâmoc haere tâpirionec bataracnuocmu, eki hâcne no rocnuocmu.

¹⁶Irec ŋic moc e mafa sâkohec eocmuo, â gorewac‐ticnere ʒâŋe biŋe feocmuo, go irec mi mezacguzejec.

¹⁷E hâmohuc wiac moc mi amecke raocmu, â ʒâŋe biŋe‐ticnezi mi bâjâpeocmu.

¹⁸Moc e ɋâricne juhuc juju‐ticnere mana aŋac eocmu, â ɋiɋicne jume gâcnezi wâc muafeckeniŋmu,

¹⁹eme sifu kâcɋenefâc‐ticne jaŋere guruo raocmu, erâ qâtec‐jopahuc tatamac basahuc jaha juocmu.

²⁰Ŋiczi juju saricko mi jurahuc juocmu, e qowi siroweeŋgopieŋ jaŋere sâc.