3 Mamana sâqocgere erâ mesahac‐nane ɋiɋicne moc mi fokac, sâqocne‐nanere erâ me kike‐nane furu moc mi fokac.
4 Hehesic‐nanezi nowaru ferâ qâurucnukac, tagi sâko iŋucne erâ kihâmocnukac.
5 Wicnane gâreckehuc âsu fikac, mutuc‐nanere erâ risimbiŋne qakopac.
6 No miŋgeŋkerâ dunduŋ dadape jukopac, ʒoaŋ ʒora ki mamakuc ehuc jukopac.
7 Ʒâiczi hoqaŋeŋ‐nane fusucmarâ isirickekac, sahac biuc‐nane dâkâne ɋiɋicne moc mi fokac.
8 No dockerâ betaŋke sâqorekopac, bunaneo ʒâic serereŋ fokacte owackehuc jukopac.
9 Wofuŋ, go harac huacbuc‐nanere kâuc mi bakomec, â husehuc jukopac i mana‐fârekic.
10 Buhândâŋ‐nane ʒocnehec âtekac, tâpiri‐nanezi behecnukac, â ʒâŋe‐nanere tatamac i wâc hâpokac.
11 Âgo qomâfâc‐nane jaŋe huc ʒâic‐nanere bâec bacnuŋgopieŋ, â soctofafâc‐nane jaŋe taic jaha juŋgopieŋ.
12 Juju nowac rozo muŋgopieŋ jaŋe bitiŋ râe‐nareŋgopieŋ, â ʒârâ ʒâpâ bâfua‐narezo maŋkeŋgopieŋ jaŋe ine doc bacnuniŋte ʒoaŋ ʒora dâŋ manasu biric ehuc juŋgopieŋ.
13 No ine qepoŋ tinac ehuc dâŋ mi manaekopac, erâ nâŋguŋ tinac ehuc micnane mi aŋkeekopac.
14 Jâmbomac, no ŋic moc dâŋ mi manaekac iŋucne, â micticnao okacne mumu mi fokac ere sâc jukopac.
15 Erâ Wofuŋ, no gore woŋec jukopac; Wofuŋ Anutu‐nane, goki dâŋ bâtikie‐narecmu.
16 Ʒiŋuc mukopac: “Jaŋe âke sisic enarehuc mi ʒeri enʒepieŋ, â kike‐nanezi biric boroc eha penaroŋ dâŋ mi enʒepieŋ.”
17 No rândiŋkezo ekopac hâcne, â ʒâic‐nanezi moc mi behecnukac.
18 No hehesic‐nane mufuakopac, â sâqocne‐nanere busâqoc manakopac.
19 Erâ no maŋgâŋ râsi enareeŋgopieŋ jaŋe tâpirihec, â fuŋne tâmiric qaisocnueŋgopieŋ jaŋe guru sâko.
20 Â biaŋnere okacne sâqocne enareeŋgopieŋ, ŋic i jaŋe kisâfâc‐nane juŋgopieŋ; ine biaŋnao qohotaekopacte iŋuc eeŋgopieŋ.
