Miti Mânec 38:3-20

³Mamana sâqocgere erâ mesahac‐nane ɋiɋicne moc mi fokac, sâqocne‐nanere erâ me kike‐nane furu moc mi fokac.

⁴Hehesic‐nanezi nowaru ferâ qâurucnukac, tagi sâko iŋucne erâ kihâmocnukac.

⁵Wicnane gâreckehuc âsu fikac, mutuc‐nanere erâ risimbiŋne qakopac.

⁶No miŋgeŋkerâ dunduŋ dadape jukopac, ʒoaŋ ʒora ki mamakuc ehuc jukopac.

⁷Ʒâiczi hoqaŋeŋ‐nane fusucmarâ isirickekac, sahac biuc‐nane dâkâne ɋiɋicne moc mi fokac.

⁸No dockerâ betaŋke sâqorekopac, bunaneo ʒâic serereŋ fokacte owackehuc jukopac.

⁹Wofuŋ, go harac huacbuc‐nanere kâuc mi bakomec, â husehuc jukopac i mana‐fârekic.

¹⁰Buhândâŋ‐nane ʒocnehec âtekac, tâpiri‐nanezi behecnukac, â ʒâŋe‐nanere tatamac i wâc hâpokac.

¹¹Âgo qomâfâc‐nane jaŋe huc ʒâic‐nanere bâec bacnuŋgopieŋ, â soctofafâc‐nane jaŋe taic jaha juŋgopieŋ.

¹²Juju nowac rozo muŋgopieŋ jaŋe bitiŋ râe‐nareŋgopieŋ, â ʒârâ ʒâpâ bâfua‐narezo maŋkeŋgopieŋ jaŋe ine doc bacnuniŋte ʒoaŋ ʒora dâŋ manasu biric ehuc juŋgopieŋ.

¹³No ine qepoŋ tinac ehuc dâŋ mi manaekopac, erâ nâŋguŋ tinac ehuc micnane mi aŋkeekopac.

¹⁴Jâmbomac, no ŋic moc dâŋ mi manaekac iŋucne, â micticnao okacne mumu mi fokac ere sâc jukopac.

¹⁵Erâ Wofuŋ, no gore woŋec jukopac; Wofuŋ Anutu‐nane, goki dâŋ bâtikie‐narecmu.

¹⁶Ʒiŋuc mukopac: “Jaŋe âke sisic enarehuc mi ʒeri enʒepieŋ, â kike‐nanezi biric boroc eha penaroŋ dâŋ mi enʒepieŋ.”

¹⁷No rândiŋkezo ekopac hâcne, â ʒâic‐nanezi moc mi behecnukac.

¹⁸No hehesic‐nane mufuakopac, â sâqocne‐nanere busâqoc manakopac.

¹⁹Erâ no maŋgâŋ râsi enareeŋgopieŋ jaŋe tâpirihec, â fuŋne tâmiric qaisocnueŋgopieŋ jaŋe guru sâko.

²⁰Â biaŋnere okacne sâqocne enareeŋgopieŋ, ŋic i jaŋe kisâfâc‐nane juŋgopieŋ; ine biaŋnao qohotaekopacte iŋuc eeŋgopieŋ.