1 Wofuŋ e tatamac‐nane â bâbâpiaŋ‐nane, no more hâwicnuocmu? Wofuŋ e juju‐nanere sâsâoc, no more mezarepemu?
2 Ŋic sindaŋnezi musoriŋnuhuc, quruŋ herâ fisiniŋmu, kisâfâc‐nane hâcne, jaŋe fâfâc‐jopame rândiŋkeniŋmu.
3 Momori guru jaŋe toma âterâ fopie, bipic tatara mi epemu; ʒika sâko moc fisi maicnume, sifu hâbi hâro jupemu.
4 Wiac mocjahare Wofuŋ numucneekopac, irec maŋhâhâŋ enareekac: Wofuŋte fickoa ŋec juc ehape juju dameŋ‐nane tarazejec; â Wofuŋte jauŋ biaŋ hone aŋac ehuc, ufuŋ‐ticnao mu wioc ehuc ŋezepac.
5 Eki hâcne dameŋ sâqocnao, boze‐ticnao soŋnuocmu, qoruc boze‐ticnao sabecnuocmu, â qânâ tikio bafecnuocmu.
6 Eme ʒi qizec‐nane bâfeŋneme fehuc, râsifâc‐nane rârec bârârec jowarupemu, ehuc qoruc boze‐ticnao taha bacnepemu, â ʒeri bari ehuc bâzi rikecnepemu; Wofuŋ gae hecnehuc musi bacnepemu.
7 O Wofuŋ, hahaŋne bahuc wirape manac, aki anonoc enarehuc micnaneo roc!
8 Goki mumeŋ, “Ʒâŋe mai‐nane basarâ bâfuaniŋ.” Irec maŋnanezi ʒiŋuc gazakac: “Wofuŋ gore ʒâŋe mai bâfuapemurâ basakopac hâcne.”
9 Ʒâŋe maige mi bâsoŋke‐narec, kiŋaŋŋicge no kimbeŋko mi bâsuecnuc. Baficnuhuc juekiczi mi behecnuc, go bâbâpiaŋte Anutu‐nane.
10 Neŋgoc mamac jahe behecnupic, Wofuŋzi ine hefârocnukac.
11 Wofuŋ, go hatagere fuŋne qazu‐narec, râsifâc‐nane jaŋere erâ hata jaŋgeŋnao jowacnuc.
12 Guriŋnuniŋte harac eŋgopieŋ jaŋerao mi qikiŋnuc; micko âkec ŋiczi dâŋnane muŋgopieŋ hâcne, maŋʒoc‐jeŋiczi gâmâc gâfâŋ wefukac.
