Miti Mânec 27:1-12

¹Wofuŋ e tatamac‐nane â bâbâpiaŋ‐nane, no more hâwicnuocmu? Wofuŋ e juju‐nanere sâsâoc, no more mezarepemu?

²Ŋic sindaŋnezi musoriŋnuhuc, quruŋ herâ fisiniŋmu, kisâfâc‐nane hâcne, jaŋe fâfâc‐jopame rândiŋkeniŋmu.

³Momori guru jaŋe toma âterâ fopie, bipic tatara mi epemu; ʒika sâko moc fisi maicnume, sifu hâbi hâro jupemu.

⁴Wiac mocjahare Wofuŋ numucneekopac, irec maŋhâhâŋ enareekac: Wofuŋte fickoa ŋec juc ehape juju dameŋ‐nane tarazejec; â Wofuŋte jauŋ biaŋ hone aŋac ehuc, ufuŋ‐ticnao mu wioc ehuc ŋezepac.

⁵Eki hâcne dameŋ sâqocnao, boze‐ticnao soŋnuocmu, qoruc boze‐ticnao sabecnuocmu, â qânâ tikio bafecnuocmu.

⁶Eme ʒi qizec‐nane bâfeŋneme fehuc, râsifâc‐nane rârec bârârec jowarupemu, ehuc qoruc boze‐ticnao taha bacnepemu, â ʒeri bari ehuc bâzi rikecnepemu; Wofuŋ gae hecnehuc musi bacnepemu.

⁷O Wofuŋ, hahaŋne bahuc wirape manac, aki anonoc enarehuc micnaneo roc!

⁸Goki mumeŋ, “Ʒâŋe mai‐nane basarâ bâfuaniŋ.” Irec maŋnanezi ʒiŋuc gazakac: “Wofuŋ gore ʒâŋe mai bâfuapemurâ basakopac hâcne.”

⁹Ʒâŋe maige mi bâsoŋke‐narec, kiŋaŋŋicge no kimbeŋko mi bâsuecnuc. Baficnuhuc juekiczi mi behecnuc, go bâbâpiaŋte Anutu‐nane.

¹⁰Neŋgoc mamac jahe behecnupic, Wofuŋzi ine hefârocnukac.

¹¹Wofuŋ, go hatagere fuŋne qazu‐narec, râsifâc‐nane jaŋere erâ hata jaŋgeŋnao jowacnuc.

¹²Guriŋnuniŋte harac eŋgopieŋ jaŋerao mi qikiŋnuc; micko âkec ŋiczi dâŋnane muŋgopieŋ hâcne, maŋʒoc‐jeŋiczi gâmâc gâfâŋ wefukac.