MII GUN MIINU MO 1:9-26

⁹Dhali ki a’di oki gwo gwansan ki uni ’kon mmohil a’di mo tani a’di ’de’kkunu bway momis mo dhala raḵ ki bu’th a’di mo, mmotiḵ uni e mo be.

¹⁰Ki uni ’kon mmohil momis ka ’thime/ mo tani hili ma, ’kwaniŋ gwasi su/ kun hi’thki burrinyeŋ kush mo doshkin i’ko’d gwari uni mo be.

¹¹Uni si’da/ o gwo mo ki: Um ’Kwani gi Pany Jaliil. Ata hila um momis ka ’thime/ kan mo? Yesus yan jin budhu mo ’peni um mo e bwam momis mo tani a’di midi doḵ/e yayu/ wakan me’dyan p̱ara um a’di e mo mmoya momis mo be.

¹²Yan’ko’d uni doḵkin e Pa Urushaliim ka nyaŋ’ko’d mo ’peni Wosh jin yuḵu ka Seṯuun jin ’dishi Pa Urushaliim is mo jin wana e ki mo jin mishu ii ka cim ma pesu/ mo be.

¹³Ki uni sekin mo tani uni iikin ’kup̱ ki mis e gu’b jin nyaŋu ka maḵamp̱o/ ap̱owa kamu/ mo, jin ’kona uni nycine/ mo, Buṯerus dhala Yohaan dhala Yakuub dhala Andaraawus dhala P̱ilibbus dhala Ṯuuma dhala Barṯulamaawus dhala Maṯṯa dhala Yakuub ya/ ma Halp̱a dhala Simaan El Ghayuur dhala Yahuusa ya/ ma Yakuub mo.

¹⁴Uni gwansani ’baar mo i’kon mo e gwon ṯal ’de/ mo mmoroc̱ sho’k ki sule/ e mon’tho mo, uni ki up̱ si’da/ mo dhala Mariyam jin ta KoYesus, uni ki ikam piti ilu/ mo be.

¹⁵Dhali ka cim gwansan mo tani Buṯerus doshki’d ki mis mo ibwaman ma waḵ buni mo dhali o gwo mo ki: (dhala waambuhany ’kwani tul isi monṯal ’de/ mo uni wana e ki issi pe’de/ mo be).

¹⁶Awaḵ pema, a’di minu mii mii mo ki Gwo ma Arumgimis midi pu’du/ mo jin okina Shi/in Dheleladhelel nṯwa/a/ ki ’twa/ ma Dawuu’d goma Yahuusa jin ta’da manshu uni bway kun bu’thkina Yesus mo.

¹⁷Haali/ a’di mishu ki a’din ṯal ’deŋ kamu/ ’peni bwam ana mo dhali ’ban piti butha a’di si’da/ e mii yan mo.

¹⁸(Dhali wathi/ yan gam mombunto ki to jin c̱inu a’di mo gom miinthus piti mo be. Dhali mmobiṯa a’di bwam/em pitiya ’cesh kan mo tani bwam piti ’twaḵka’d mo dhala ’colem piti ’baar mo ṯẖa’thka’d ka pije/ mo be.

¹⁹Dhali a’di warki’d ki mo jin mishkunu mo e bwaŋ ’kwani gi Pa Urushaliim kagahara mo ki mombunto yan yuḵu ki ’twam buni ka Akeldama jin o ki: mombunto ma bas mo).

²⁰Haali/ a’di ’kwarkunu mo eya warka/ ma Masamiir mo ki: Dhalki monyc̱a’b piti warki’d ki mombwamma’du/ mo dhali dhalki wathiŋ kamu/ ki mii dhal bway mo mmoc̱a’bi mo yan mo. dhali Dhalki mom piti butha wathiŋ kamu/ mo.

²¹A’di mina ṯal ’deŋ kamu/ mii war ka man/o gwo nyaḵki ana mo gom mompinum piti mo tani ṯal ’de/ ’peni bwaŋ ’kwani kun nyaḵ ’ko ki ana ka cimi ’baar mo ki Tap̱a Yesus yuthurki’d e bwam ana mo

²²mmoṯel ’pen ka cim jin miin ma Yohaan a’di ki yi’de/ mo ntaga cim jin budhu a’di mo ’peni bwam ana mo.

²³Dhali uni ki kwany ’kwani isu/ mmoṯor uni eya tente/ mo, Yuusup̱ jin yuḵu ka Barsaaba jin yuḵu ki gwaya kamu/ ka Yusṯus si’da/ uni ka Maṯṯiyaas mo.

²⁴Dhali uni ’thon mo dhali o gwo mo ki: /En Tap̱a jin mishki’da duŋ ’kwani ’baar mo tani ṯori ’peni bwam uni su/ mo a’din ṯal ’de/ jin kwanykina /e mo

²⁵mmobu’th mo mii yan mo dhali mo ma mankar ma Yesus ki she/ yan jin this ma Yahuusa e mo gom a’diŋ gwom piti ki a’di midi ya mo e mom piti mo be.

²⁶Dhali uni ki biṯ to gom uni mo tani to biṯki’da p̱owa Maṯṯiyaas mo dhali a’di nyaḵu gway deŋ e ki imandhun ma Yesus gwansan ki she/ kun ’koni ’kume’d i’ce’dka ’de/ mo be.