MII GUN MIINU MO 19:29-41

²⁹Dhali kum bampa/ yansan ’tu’du/ ki mo ma c̱ulma’th mo dhali uni ṯẖa’thkin ki bwan ṯal ’de/ e dhan mo jin ta montul is jin biruwa bir mo mmobu’thkina uniya Ghayuus mo dhala Aristarḵus kun ta ’Kwani gi Pam Makiduniyya kun ta imannyaḵ ii ka Buulus mo.

³⁰Dhali ka Buulus dina gwo ibwa mmose i bwaŋ ’kwani mo tani imanciḵ gwo nonki a’di ’kup̱ mo be.

³¹Dhali kun tiya si’da/ ’peni ’kwani kun tana ’kaŋ’kup̱ ki mo gi Pa Asiyya mo tani mmotana uni imugum piti tani uni hashki a’di gwo mo dhali malas a’di mo jin mina a’di diki c̱i is piti ki ya mo e mo jin ta montul is yan jin biruwa bir mo.

³²Dhali kun tiya si’da/ cuuni ton ’de/ mo dhali kun tiya si’da/ i tiyan tiya mo. Haali/ montul is yan ta’da c̱ulma’th mo be dhali uni ’kon ka ris kun molki to jin tulkina uni is kan mo be.

³³Dhali uni suskina Iskandar ka pije/ ’pena waambuhany ’kwani mo mmokarkina ’Kwani Yahuuda/ a’di eya tente/ ki ṯẖorony mo. Dhala Iskandar wuḵki uni ki me’d mo dhali midi ’taki woṯẖ gwo is gom ’kwani mo.

³⁴Hili ki uni nyiṯẖkin ki a’di ta Wathi/ Yahuuda/ mo tani uni ’baar cuukin ki ’twan ṯal ’de/ mo ki mo jin wana e ka tente/ su/ mo ki: A’di jin ta jin eḵa/ eḵ mo tani a’di ita’da Arthamiis gi Pan Ep̱asus mo.

³⁵Dhali ka hiliŋgwoŋḵan gom pa mu’thki’da waambuhany ’kwani ’twa/ mo tani a’di ki o uni gwo mo ki: Um ’Kwani gi Pan Ep̱asus. Ki wathi/ jana si’da/ idi’d jin diki mish ki ’Kwani gi Pan Ep̱asus ta imanhil gu’b jin luŋuwa dhan tony caaga/ yan jin yuḵu gway ka Arthamiis mo dhali jamas gi to yan jin biṯki’d ’pena Sap̱s mo?

³⁶Haali/ a’di gi wakan tani ki to gwansan minu mol waṯ mo dhali um mini mii ta gi mo mo mmo’ko ki shwam mo dhali ’koki mii toŋ kamu/ ki ji ram mo.

³⁷Haali/ um suski ’kwani gwansan imahan mo kun ’koki ta ’kwani kun ḵwali to ’peni gu’b kun luŋu to mo dhali uni si’da/ ’koki ta ’kwani gun wali gwo sor ap̱owa dhan tony caagam bana yan jin luŋu mo be.

³⁸Waḵka Dimiṯriyuus si’da/ dhali tap̱aŋ ’kwani kun ta gi gwocon kun nyaḵ ’ko ki a’di mo ta gi gwo ap̱o/ wathiŋ kamu/ mo tani acim dhunu mo gom gwon dwall mo dhali iwaḵiil ’kon si’da/ mo. Dhalki uni yer is buni gway ka rem ’kup̱ mo ma.

³⁹Hili waḵki/ um ŋap̱i toŋ kamu/ gom gwon tiya kun doṯu/ mo tani a’di minu thoson mo e montul is yan jin yuḵuwa yuḵ mo.

⁴⁰Haali/ ka jiŋ gana/ ana ’kona e mo jin ṯagu wu mo e mo jin yeru is ki gway mo gom mo jin doshu ka nyora ṯal ’de/ ki bimbir ka cim yansan mo dhali mmomiinu a’di mo ka wuny is ’te/ mo. Dhali gom a’di yan mo tani ana mina mol gwo thoḵ goma nyor yan jin deḵu/ mo.

⁴¹Dhali ki a’di daḵki gwo o kan tan mo tani a’di si’da/ ’cuḵki montul is mo be.