MII GUN MIINU MO 15:29-40

²⁹ki um mini dhal mii ’pen mo ’peni to kun ’ciṯẖu/ mo mmomiiya basa ’cesh mo mmoluŋ tomp̱inycon dhali ’peni miin to ma bas mo dhali ’peni to kun minyciru ’kus mo dhali ’peni mo jin miinu miinyc̱al si’da/ mo be. Waḵki/ um mini non is bum ’peni to gwansan mo tani a’di midi bor mo gom um mo. ’Koyi ki mom’bi’th is mo ma.

³⁰Wakan ki uni ’cuḵkunu mo tani uni p̱u’dkin ka luŋgu’b mo e Pa Anthaakiya mo dhali mmotula uni awaambuhany ’kwani is mo mmonṯal ’de/ mo tani uni ki c̱i uni gwo kun ’kwarkunu mo be.

³¹Dhali ki uni deŋki a’di e mo tani uni ’kunykina bwa mo gom gwo malas yan mo be.

³²Dhala Yahuusa dhala Sila mmotana uni imanc̱i gwo si’da/ mo tani uni malaskina waḵ yan ki gwo ka ris mo dhali ṯel uni sho’k mo be.

³³Dhali ’ko’di uni ’kokin ki rash rash ari’ceenne/ mo tani uni ’cuḵkunu mo ki moŋḵu’th is ’pena waḵ yan e uni gun ṯu’cki uni ki ii mo be.

³⁴Hili a’di ṯoshkin ma Sila ki a’di ’boro’d mo jin mina a’di c̱a’b imun mo.

³⁵Hila Buulus dhala Barnaaba ’kokin mo e Pa Anthaakiya mo mmoṯor gwo mo dhali mmoc̱i gwon Tap̱a nyaḵki aris kun tiya si’da/ mo be.

³⁶Dhali ’ko’da cim ka hony/e mo tani aBuulus oki’da Barnaaba gwo mo ki: Dhalki ana doḵa shwane/ mo dhali ii yilkina/ awaḵ bana eya ris bampa/ ’baar ki ’beles mo kun c̱ikina ana gwon Tap̱a mo mmop̱ar uni e mo ki uni wakata mo?

³⁷Dhala Barnaaba e bwam piti mo tani a’di o’d ki susa Yohaan si’da/ jin yuḵu ki gwaya kamu/ ka Markus mo.

³⁸Hila Buulus a’di ikulumki gwo ibwa mo ki a’di diki ’bor mo mmosus a’di jin ya’d mo ’peni uni ’peni Pam Pamp̱iliyya mo mmonyaḵ ya ki uni mo a’di jin diki nyaḵ ya ki uni eya ṯu’c mo.

³⁹Dhali gwo jin kaaka jin wala uni piki’d mo tani a’di ḵwa/ uni bwa c̱em buni mo dhala Barnaaba suski’da Markus nyaḵki a’di mo dhali uni iikin mo eya ḵur yi’de/ jin bela ’tham mo ki bway gi Paŋ Kuprus mo be.

⁴⁰Hila Buulus kwanyki’da Sila mo dhali uni iikin mo mmodhun ma waḵ yan uni eya ’the gi Tap̱a mo be.