MII GUN MIINU MO 13:21-35

²¹Dhali ka nyaŋ’ko’d doḵ/e mo tani uni doṯkina maliḵ mo dhala Arumgimis ki c̱i uni aShawuul jin ta ya/ ma Kish jin ta wathi/ gi ’kwani ma waḵ ma Benyamiin ki mo embul ki yil issu/ mo.

²²Dhali ki a’di ḵwa/ki a’di mo tani a’di piki’da Dawuu’d mmota amaliḵ buni mo. Gom a’di si’da/ a’di ki ṯe gwo mo dhali o gwo mo ki: Aha/ gamkina Dawuu’d jin ta ya/ ma Yassa jin ta wathi/ jin gam ma du ki aha/ jin midi mii bwam pemi ’baar mo.

²³’Peni emen gi wathi/ yan mo tani Arumgimis me’d jin onu gwo is mo tani guyi’da Manwoṯẖ gom ’Kwani ma Israyiil mo jin ta’da Yesus mo

²⁴me’dyin ṯor ma Yohaan gwo nṯwa/a/ mo mmodina a’di ki yayu/ naskina/ mo tani gwo mmomiiya mii ki yi’de/ gom mo jin minu rica du is goma ris ’Kwani ma Israyiili ’baar mo.

²⁵Dhali ka Yohaan di’d mmo’baar bway piti mo tani a’di o gwo mo ki: Um ṯosh ki aha/ tana aja mo? Aha/ dina ki ta a’di mo. Hili mo mo ma, jamu/ midi yayu/ i’ko’di aha/ mo, ap̱p̱a/ sho’k piti mo tani aha/ dinaki ’bor jin miga/ ’cuḵ a’di mo.

²⁶Ikam pema um kun ta uc̱i ma Ibrahiim kun iiyin ’pena tora ’de/ mo dhali um gwan ibwaman um kun ḵo/kina Arumgimis mo tani gwo gom mowoṯẖ yan hashkunu mo gom ana mo be.

²⁷Haali/ uni kun ’koni Pa Urushaliim mo dhali tap̱am buni si’da/, haali/ uni ’koki mish a’di mo dhali ’koki mish gwo gi ’twa/ gi imanc̱i gwo kun deŋu e mo ka cim ma pesu/ isa yempa/ mo tani uni miikina uni ’baar mo mmowaḵkina uni a’di mo be.

²⁸Dhali uni bala gamana ta i a’di mo mmoc̱i a’di mmowu mo hili uni doṯkina Bilaaṯus gwo mo ki a’di minu mii ’kosh mo be.

²⁹Dhali ki uni ’baarkina ris to ’baar mo mmomii kun ’kwarkunu mo gom a’di mo tani uni bu’thki a’di ka ’cesh ’peni cwa mo dhali ’thi a’di e moŋ’kup̱aje mo be.

³⁰Hili Arumgimis ’de’k a’di ’peni mowu mo.

³¹Dhali a’di mishu ka cim ka ris mo ’peni uni kun nyaḵ ii ki a’di ’peni Pany Jaliil ’kup̱ ki Pa Urushaliim mo tani uni shwane/ ita iman/o gwo gom a’di ibwaŋ ’kwani mo be.

³²Dhali am guyina um gwom ’borga/ ’peni jin onu is me’d jin ṯoru ibaba mo

³³ka Arumgimis ’baarki mii yansan e ana gom uc̱im bana mmo’de’kkina a’di aYesus mo be. Me’d jin ’kwarkunu mo si’da/ ka Masmuuri su/ mo ki: /E ta Ya/m pem mo. Ka cim yansan jin karka/ /e mmodi e aha/ mmotaya/ Ya/um mo.

³⁴Dhali mmotana a’di gi wakan mo tani a’di ’de’kkina a’di a’di ’peni mowu shwane/ mo ki a’di midi diki ṯu’k ki sule/ mo e momp̱u/ mo, dhali a’di oki gwo cikise/ mo be ki: Aha/ mina c̱i um mom’bor mii ma Dawuu’d kun ta kuŋ ḵogu mo dhali kun ta ku isiŋ gana/ si’da/ mo.

³⁵Haali/ a’di si’da/ o’d kan eya masmuura kamu/ ki: /E mini diki c̱i amanḵogum pini mmomish momp̱u/ mo.