Mbouŋ To Yes Israela 81:1-14

¹Mbouŋ to Asap Lolomim poia pa Maaron, ve ambou pani. Pa iit taghamgham tapiriin ila tooni. Tintinmim pa Maaron to Yakop, ve ayoor eeza toman aliŋamim tiina.

²Ait mbouŋ ve ambou. Ve atok kakaap, ve arav gita ve gabua siriv, leso agham mbouŋ paghuuna.

³Saawe to kaiyo izaa paaghu, ve saawe to kaiyo dodoliiŋ, ene saawe to talup ghiit ve tasuŋ. Tauvene aviv tavuur ve apaburigin suŋuuŋ.

⁴Pa ŋgar tauvene, ene itaghon tutuuŋ tau Maaron ighuru pa iit Israela alok wa. Maaron to Yakop ighe tataghon tutuuŋ tane.

⁵Saawe tau i igham malmal pa yes Isipa, i isaav pa iit Israela to tataghon tutuuŋ tane, leso itiŋa tavalupu ghiit tamin eemon. Yau nalooŋ ŋeer ee aliiŋa ilam. Ta muuŋ ve ilam, nalooŋ aliiŋa tauvene mako. Isaav ighe:

⁶“Yau ta nazugh yauyauŋ pataŋani izi pa avaramim, ve nagham gham amariau pa badooŋ gabua.

⁷Muuŋ, yam aleep ila pataŋani tiina loolo, ve ataŋ rarai ghau to nauul gham. Ve yau nalooŋ taŋiiz tsiam, ve napas gham avot pa pataŋani tsiam. Yau nayooŋ ila taitai gabgabuai tau lalaav lutluutu ivotvot pani na, ve nayol aliŋamim. Ve yau natoov gham izi yaa ziige to nugh Meriba.

⁸Yam tamtamon tsiau, alooŋ saveeŋ ariaaŋa tau naghe nasavia payam ne. Yam Israela, aghur taliŋamim pa aliŋag tane ve ataghoni, o poi!

⁹Maaron ite paam ileep ila sosomim ve abees pani sov. Yau mon, o abees payau. Tauvene aput aghemim pa maaron karomŋa to nugh siriv sov.

¹⁰Pa yau Yoova ta Maaron tsiam. Yau ta nagham gham apul Isip. Yau nasaav payam naghe: Akaak avomim tiina. Leso napavoni pa gabua popoia.

¹¹Eemon tamtamon tsiau tilooŋ aliŋag mako. Yes Israela timbuzir payau.

¹²Ŋgar toozi iyaryaaŋ kat. Lolozi pa loŋaaŋ saveeŋ mako. Tauta napul zi titaghon tauzi ŋgar toozi.

¹³Yau napasawal naghe le tamtamon tsiau tilooŋ aliŋag, ve titaghon eez tsiau!

¹⁴Leso rekia mon ve koiazŋa tiyamaan nimag, ve natatan zi.