Mbouŋ to Yes Israela 51:3-15 in Mutu

³ Pasa, you naghilaal sosor tiou wa. You nazoor aliŋam, ve nayel pa ataam tiom. Moghon moghon, sosor tiou inepneep toman ghou, ve matag iŋgalŋgali.

⁴ Sosor to naghami, nene iŋarua ghom moghon. You nagham ŋgar samia ila matam. Tovenen ighaze uvotia sosor tiou ivot ighazooŋ, nene deŋia. Onoon kat, ighaze uŋgabiiz ghou ve ughur atia payou, nene sosor maau.

⁵ Sawa to tinaŋ ipoop ghou ve inim, you nayel pa ataam tiom. Sawa to tinaŋ inaama payou, samia ikis ghou pataghaaŋ wa.

⁶ Maaron, yom ughaze you nataghon saveeŋ onoon toman lolog. Tovenen taum upatooŋ ghou pa ŋgar popoia. Leso nakisi tuŋia ila lolog.

⁷ Ureu sosor tiou isob ilale. Leso naŋgalaaŋ ila matam. Urughuuz ghou le naŋgalaaŋ kat nanimale yaghur tae pisosooŋa.

⁸ You naghaze nalooŋ ghom usaav ughaze yom ureu sosor tiou wa. Leso tinig iza, ve lolog poia muul. Yom ughur pataŋani tiina kat iŋarua ghou pa sosor tiou. Uul ghou, leso tinig iza muul.

⁹ Ŋgar tiou naol to tiyel pa ataam tiom, matam ila padi muul malep. Ureu sosor tiou isob ilale.

¹⁰ Maaron, ugham ŋgar ŋgalaaŋa ivot ila lolog, ve upalot ghou. Leso nayoon tuŋia muul, ve nataghon katin ŋgar tiom.

¹¹ Undiir ghou pa naghom malep. Ve uŋgwaaz Avuvum Patabuaŋ ighau payou malep.

¹² Muuŋ, yom ugham mulin ghou le lolog poia kat. Aazne, naghaze ugham tovene payou muul. Upamundigin ghou, leso matag loŋloŋaiŋa payom irau sawa isob.

¹³ Ighaze ugham tovene, you pale napatoot yes to tizorzoor aliŋam, ve yes to tighamgham sosor pale titoor ŋgar todi imuul ilat payom.

¹⁴ Maaron, sosor tiou to narab tamtoghon imaat, nene tiina kat. Irau namaat pani. Eemoghon yom Maaron tiou ve Volaaŋa tiou. Tovenen ugham mulin ghou, ve ureu sosor tiou ilale. Leso lolog poia kat, ve nambou tapirig, ve napait izam pa ŋgar tiom deŋia.

¹⁵ You mayag pa sosor tiou, ve neneeŋag. Tovenen ureu sosor tiou ilale. Leso avog pakia, ve napait izam.

³ Pa yau naghilaal sosor tsiau wa. Yau nazoor aliŋam ve nasosor pa eez tsio. Saawe isov, sosor tsiau ighengheen tomani ghau, ve matag iŋgalŋgali.

⁴ Sosor tau naghamu ne, ene iŋarui ghom mon. Yau nagham ŋgar saghati ila yo matam. Tauvene isaav ighe uvotia sosor tsiau ivot ighazooŋ, ene iduduuŋ. Onoon kat, isaav ighe ugabiiz ghau ve ughur atuya payau, ene sosor mako.

⁵ Saawe tau tinaŋ ipoop ghau ve ilam, yau nasosor pa eez tsio. Saawe tau tinaŋ inaam ghi payau, saghati ikis ghau pataghaaŋ wa.

⁶ Maaron, yo ughe yau nataghon saveeŋ onoon toman lolog. Tauvene taum upaghazoŋai ghau pa ŋgar popoia. Leso nakisi tuŋia ila lolog.

⁷ Ureu sosor tsiau isov ilale. Leso naŋgalaaŋ ila yo matam. Urughuuz ghau le naŋgalaaŋ kat imin taitai pisosooŋa.

⁸ Yau naghe nalooŋ ghom usaav ughe yo ureu sosor tsiau wa. Leso tintinig ve lolog poia muul. Yo ughur pataŋani tiina kat iŋarui ghau pa sosor tsiau. Uul ghau, leso tintinig muul.

⁹ Ŋgar tsiau naol tau isosor pa eez tsio na, matam ila pani muul sov. Ureu sosor tsiau isov ilale.

¹⁰ Maaron, ugham ŋgar ŋgalaaŋa ivot ila lolog, ve upalot ghau. Leso nayooz tuŋia muul ve nataghon duduŋai ŋgar tsio.

¹¹ Uziir ghau pa naghom sov. Ve usan Avuvum Patabuyaaŋ ighau payau sov.

¹² Muuŋ, yo ugham mulin ghau le lolog poia kat. Aazne, naghe ugham tauvene payau muul. Upaburigin ghau, leso matag loŋloŋai payo irau saawe.

¹³ Ighe ugham tauvene, yau aat napaduduuŋ yes tau tizorzoor aliŋam, ve yes tau tighamgham sosor na, pale titoor ŋgar toozi imuul ilat payo.

¹⁴ Maaron, sosor tsiau to naliŋ siŋ, ene tiina kat. Irau to namaat pani. Eemon yo Maaron tsiau ve Uleeŋa tsiau. Tauvene ugham mulin ghau, ve ureu sosor tsiau ilale. Leso lolog poia kat, ve nambou toman aliŋag tiina, ve napait ezam pa ŋgar tsio duduuŋa.

¹⁵ Yau mayag pa sosor tsiau, ve naneneeŋ mon. Tauvene ureu sosor tsiau ilale. Leso avog pakia, ve napait ezam.