Mbouŋ to Yes Israela 47:1-8 in Mutu

¹ Yam tamtoghon to ndug ndug, tinimim iza ve apambar nimamim! Yam asob alool, ve ambou tapirimim pa Maaron.

² Pasa Yoova, ye Maaron Tiina To Ilib Pa Ndimaronŋa Tisob. Amatughez pani ve ataghon ŋgar toni. Onoon kat, ye kinik tiina. Tamtoghon tisob to taan tineep ila samba.

³ Ye itatan ndug ndug, ve ighur di tineep ila sambamai. Yes to tiwatagi maau ne, ye irab di tizi, ve nivazag di ila aghemai samba.

⁴ Iit siŋ to Yakop, Yoova lolo ineep toit kat. Tauto irab motin taan suruvu eez, ve igham pait. Iit tiniid iza ve tapakur ghiit pa taan to ye igham pait.

⁵ Maaron izala ina to ghamuuŋ pooz ve ineep tonowe. Tovenen tavuur itaŋtaŋ, ve tamtoghon tilolool toman lolodi poia.

⁶ Ambou, ambou! Ambou ve apait Maaron! Ambou ve apait kinik toit iza!

⁷ Pasa Maaron, ye kinik tiina. Tamtoghon tisob to taan tineep ila samba. Tovenen ambou mbouŋ, ve apaiti!

⁸ Maaron ineep ila ina patabuaŋ to ghamuuŋ pooz, ve iŋgin ndug tisob. Tamtoghon tisob tineep ila samba.

¹ Mbouŋ to yes Kora Yam nughmariŋ, tintinmim ve aposai nimamim! Yam asov ayoor Maaron eeza, ve ambou mbouŋ to apakuru!

² Pa Yoova, i Maaron Tiina Tau Iliiv Zimaronŋa Tisov. Aroi pani ve ataghon ŋgar tooni. Onoon kat, i kinik tiina. Tamtamon tisov to taan tileep ila i saamba.

³ I itatan nugh nugh, ve ighur zi tileep ila sambamai. Yes tau tiwataghi mako na, i irav zi tizi, ve nivaghaaz zi ila aghemai saamba.

⁴ Iit siŋ to Yakop, Yoova loolo igheen toit kat. Tauta irav motin taan sirivu, ve igham pait imin leen motot. Iit tintiniin ve tapakur ghiit pa taan tau i igham pait.

⁵ Maaron izala niia to ghamuuŋ pooz ve ileep ta sewe. Tauvene tavuur itaŋtaŋ, ve tamtamon tisirsir toman lolozi poia.

⁶ Ambou, ambou! Ambou ve apakur Maaron! Ambou ve apait kinik toit eeza!

⁷ Pa Maaron, i kinik tiina. Tamtamon tisov to taan tileep ila i saamba. Tauvene ambou mbouŋ to apakuru!

⁸ Maaron ileep ila niia patabuyaaŋ to ghamuuŋ pooz, ve iŋginŋgin nughmariŋ. Tamtamon tisov tileep ila i saamba.