Mbouŋ To Yes Israela 39:1-10

¹Mbouŋ to David David itoor mbouŋ tane pa Yedutun, i ŋeer tau imuŋmuuŋ pa mbouŋ Yau nasaav pa taug naghe: “Yau aat naŋgin taug poi. Leso avog isosor sov. Isaav ighe naleep tomania zeran sasaghati, yau aat naŋgin avog poi.”

²Tauvene napoon avog, ve nasavia saveeŋ eta mako. Nayai ghau, ve naneneeŋ mon. Eemon nagham ŋgar naol ila ila le lolog ipazaagh ghau naghe nasaav.

³Pasaa, nagham ŋgar naol kat, le ateg basbasuuŋ. Tauta irau naneneeŋ muul mako, ve naghason Maaron naghe:

⁴“Yoova, upaghazoŋai ghau. Ndaman tsiau piiz ta ighengheen soone? Pale ŋeez o namaat ve nasov pa taan? Uul ghau leso naghilaal naghe: Malau mako pale lepoogh tsiau to taan isov.

⁵Yo ughur leg saawe tuuku mon to naleep izi taan. Saawe to lepoogh tsiau izi taan, ene imin gabua sorok ila yo matam. Onoon kat, tamtamon tisov to taan lepoogh toozi, ene imin avuvuun tau ivot ila avoon. Tileep rig ve tisov. Irau taghit zi muul mako.

⁶Tamtamon tilaghlaagh pa uraat naol. Eemon lepoogh toozi, ene tuuku imin ai yavyaava tau ighe aaz izila, ene taghita muul mako. Matazi imin naol, ve tilala tilamlam pa uraat tighe tindou lezi gabua katini. Eemon tirav tauzi sorok. Pasaa, tikankaan pa sei ta pale ighamuur gabua toozi tawe.

⁷Yoova, saa gabua ta pale naghur matag pani to iuul ghau? Gabua eta mako. Yau naghur matag payo mon.

⁸Yau nazoor aliŋam ve nagham sosor. Upul sosor tsiau isov, ve ugham mulin ghau pa pataŋani to sosor tsiau. Mako pale yes kankanooŋa tau tiwatagh ghom mako na tisik saveeŋ veleghiiŋ payau.

⁹Aazne, yau naneneeŋ mon. Irau saveeŋ eta ivot ila avog mako. Pasaa, yo taum ta ugham pataŋani tane ivot payau.

¹⁰Maaron, uŋgal matag irao! Nimam ighanghan ghau le tapirig isov wa.