Mbouŋ to Yes Israela 137:1-9 in Mutu

¹ Yei mbolemai izi ila ya to yes Babilona digedi, ve niŋazuuv ila pa ndug Zion, le lolomai isami ve nitaŋ.

² Tovenen nisaron gita tiei tizala timonau ila ai bogadi. Pasa, lolomai pa nirab di muul maau.

³ Koiamai to tigham ghei ninim nineep ndug todi, tighaze nimbou mbouŋ pida, leso tilooŋa ve igham lolodi poia. Tisaav payei tighaze: “Ou, ambou mbouŋ tiam eta to ndug Zion ve nilooŋa lak!”

⁴ Eemoghon aazne, yei nineep ninim loomba pa taan ite. Pale nimbou mbouŋ pa Yoova izi ndug tonene vena?

⁵ O Yerusalem, ighaze lolog imaagh payom, Yoova tau pale iwaghamun nimag waan, leso narab gita muul sob.

⁶ Onoon kat, ighaze matag iŋgal Yerusalem muul maau, ve tinig iza pa mbeb ite paam ilib pa Yerusalem, Yoova tau pale iwaghamun avog, leso nambou muul sob.

⁷ O Yoova, matam iŋgal ŋgar samia to yes Edoma, ve uyati. Pasa, sawa to koiamai tireu Yerusalem, yes Edoma tinidi iza, ve tisaav tighaze: “Iya! Poia kat pa areu Yerusalem. Areu mbirisani izi!”

⁸ O ndug Babilon, yom uwaghamun ndug katindi, tovenen yom paam pale usami. Tamtoghon to ighaze iyat ŋgar to yom ugham payei, nene pale tini iza pa poia to Maaron to iza toni!

⁹ Ve yes to tikis ndinatumim geegeu, ve tilos di tizala yaam pogho, tovene paam. Poia to Maaron pale iza todi ve tinidi iza.

¹ Yei mbolemai izi ila yaa to yes Babilona zigezi, ve niŋuzuuv ila pa nugh Zion, le lolomai isaghat ve nitaŋ.

² Tauvene nisaron gita tsiei tizala tituuk ila ai bogazi. Pasaa, lolomai pa ravuuŋ zi muul mako.

³ Koiamaiŋa tau tigham ghei nilam nileep nugh toozi na, tighe nimbou mbouŋ siriv, leso tilooŋa ve igham lolozi poia. Tisaav payei tighe: “Ou, ambou mbouŋ tsiam eta to nugh Zion gha nilooŋa lak!”

⁴ Eemon aazne, yei nileep nimin loom pa taan ite. Pale nimbou mbouŋ pa Yoova izi nugh tane mindai?

⁵ O Yerusalem, isaav ighe lolog iveegh payo, Yoova tauu aat ivaghamunia nimag tapir, leso narav gita muul sov.

⁶ Onoon kat, isaav ighe matag iŋgal Yerusalem muul mako, ve tintinig pa gabua ite paam iliiv Yerusalem, Yoova tauu aat ivaghamun avog, leso nambou muul sov.

⁷ O Yoova, matam iŋgal ŋgar saghati to yes Edoma, ve uyatu. Pasaa, saawe tau koiamaiŋa tireu Yerusalem, yes Edoma tintinizi ve tisaav tighe: “Iya, poia kat pa areu Yerusalem. Areu mbirisaini izi!”

⁸ O nugh Babilon, yo uvaghamunia nugh katini, tauvene yo paam pale usaghat. Tamtamon tau ighe iyat ŋgar tau yo ugham payei na, ene pale tintini pa poia to Maaron tau izaa tooni!

⁹ Ve yes tau tikis natumimŋa geegeu ve tilos zi izala maet paavo na, tauvene paam. Poia to Maaron pale izaa toozi ve tintinizi.