Mbouŋ To Yes Israela 135:3-14

³Apait Yoova! Pasaa, i poia le poia kat. I eeza tiina pa ŋgar paghuuna tau ighamghamu na. Tauvene apait eeza ila mbouŋ.

⁴Muuŋ, Yoova isiigh Yakop, ve ighamu imin le. Tauta ighita iit Israela ighe iit tamtamon tooni kat.

⁵Yau nawatagh: Yoova, i eeza tiina kat. Maaron toit iliiv zimaronŋa tisov.

⁶Isaav ighe Yoova loolo pa ghamuuŋ ŋgar eta izi sambam, ma izi taan, ma ila te paavo, ma izila te loolo, ene ighamu mon. Pasaa, gabua eta irau ikeeka mako.

⁷I ta igham taitai indoundou ghi ila yaghur puughu. Ve igham uman izizi, ve igham nugh ighani milia. I ikakaak ruum tooni tau yaghur igheen iloŋ ila na atamana, leso ivot ve ilaan irau taan.

⁸Muuŋ, i irav yes Isipa natuzŋa aidabazŋa tomania ŋgai toozi tau tipoop zi imin maata na le tisov timataar.

⁹I igham gabua ŋgeretazi ve uraat tintiina izi Isip, le ivaghamun kinik toozi tomania uraata tooni tisov.

¹⁰Saawe tau yes Israela tiloŋ tila taan to yes Kanaana, i irav tamtamon to nugh nugh timatmaat. Kinik tau tapirizi tiina na paam, i irav zi timatmaat.

¹¹I irav Sihon tau kinik to yes Amora, Og tau kinik to Basan, ve kinik tisov to nugh nugh to Kanaan.

¹²Ve igham taan toozi imin yes Israela lezi motot. Leso tamtamon tooni tileep pani taghon taghon gha ila.

¹³O Yoova, ezam tiina pale ighengheen tauvene irau saawe! Tamtamon pale matazi iŋgalŋgal uraat tsio, ve tivotia varum taghon taghon gha ila.

¹⁴Pasaa, Yoova iyozyooz pa tamtamon tooni, ve ighurghur atuya pa yes tau tigham saghatin zi na. I loolo isasaghatin besooŋa tooni, ve iuluul zi.