Mbouŋ to Yes Israela 132:2-18 in Mutu

² Muuŋ, David imbua saveeŋ ariaŋa toman Yoova, ye Maaron ariaŋa to Yakop. Ve ipariaaŋ saveeŋ tonowen le iyaryaaŋ kat.

³ Ighaze: “You irau nalooŋ nala ruum tiou, ve nala inag to ghenooŋ sone.

⁴ Irau ateg izi, ve nagheen sone.

⁵ Le irau nandeeŋ ndug eta pa Yoova. Ŋgar tiou iyaryaaŋ kat naghaze nakaal ndug eta, leso inim Maaron ariaŋa to Yakop ina to nepooŋ, ghoro ateg izi!”

⁶ Sawa to yei nineep izi taan suruvu to Eprata, yei nilooŋ Bokis to Saveeŋ Mbuaaŋ varu. Tovenen nila le nighita ineep igharau ndug Yar.

⁷ Muri ghoro, tisakia ila Yerusalem. Tovenen nisaav nighaze: “Tamundig tala pa Maaron ina to nepooŋ to Yerusalem we. Tala tagharau ina to ghamuuŋ pooz, ve taput agheed pani, ve tapaiti.”

⁸ O Yoova, umundig toman Bokis to Saveeŋ Mbuaaŋ, ve ula pa inam to nepooŋ, ve atem izi. Bokis tonowen to inim ghilalooŋ pa tapirim.

⁹ Yei nighaze ŋgar deŋia ineep tuŋia ila to ndiran tiom to watooŋrau, inimale nonogiiŋa to moghon moghon tindud di pani. Ve yes to lolodi ineep tuŋia ilat tiom ve titaghon ataam tiom, nighaze tilool ve tipait izam toman lolodi poia.

¹⁰ O Yoova, matam iŋgal mbesooŋa tiom David. Ye ndamo payei, tauto nighaze ulooŋ suŋuuŋ tiei tonene. Paghu toni to yom ughuri inim kinik payei ne, upul murim pani malep.

¹¹ Muuŋ, Yoova imbua saveeŋ ariaŋa toman David, ve ipariaaŋa le iyaryaaŋ kat. Tovenen irau ireua maau. Isaav ighaze: “You pale naghur papaghu tiom eta inim kinik, leso igham inam, ve ineep ila inam to ghamuuŋ pooz.

¹² Ve ighaze papaghu tiom matadi kisin saveeŋ mbuaaŋ tiou, ve titaghon tutuuŋ tiou, nene pale naghur papaghu todi paam tinim kinik, ve tineep ila inam to ghamuuŋ pooz to aazne, ve itaghoni taghoni gha ila. Tutuuŋ tonenen, you taug pale napatooŋ ŋgara padi.”

¹³ Yoova isia ndug Zion, ve ighami inim le wa. Ndug tonene, to ye lolo pani ighaze ineep ila.

¹⁴ Tauto isaav ighaze: “Ndug tonene pale inim inag to nepooŋ irau sawa isob. Inag to ghamuuŋ pooz pale ineep sualen. Pasa, lolog pa ndug tonene kat.”

¹⁵ You pale nagham poian tamtoghon to Zion, ve poia tiou tiina iza todi. Leso tiraua kat pa mbeb to naol. Ve nagham aniiŋ pa yes mbolaaŋa todi, ve tighan le apodi isuŋ.

¹⁶ Ve yes to watooŋrau to tineep izi Zion, you pale napalot di pa uraat todi. Leso tinim ataam pa ulaaŋ tiou ila pa tamtoghon. Tovenen tamtoghon to Zion to lolodi ineep tuŋia inim tiou ve titaghon ataam tiou, pale tilool ve tipait izag toman lolodi poia kat.

¹⁷ Paghu to David to naghuri inim kinik ve ineep izi ndug tonene, you pale nagham iza ve tapiri ivot inim tiina. Kinik to you taug nasia ve naghuri pa uraat, you pale napalot papaghu toni, ve tigham pooz itaghoni taghoni gha ila, tinimale lam to iyaryaar irau sawa isob.

¹⁸ You pale natatan kinik koia, ve moghon moghon tinepneep toman mayadi. Eemoghon yes to tinepneep ila kinik samba, you pale napalot di, ve nagham di tineep poia kat. Leso nepooŋ todi poia tonowen ipambood kinik.

² Muuŋ, David imbu saveeŋ ariaaŋa tomania Yoova tau Maaron saksaki to Yakop na. Ve ipariaaŋ saveeŋ tawe le iyaryaaŋ kat.

³ Ighe: “Yau irau naloŋ nala ruum tsiau, ve nala niag to ghenooŋ soone.

⁴ Irau namariau, ve nagheen lolog iveegh soone.

⁵ Le irau nandeeŋ nugh eta pa Yoova. Ŋgar tsiau iyaryaaŋ kat naghe nail nugh eta, leso imin Maaron saksaki to Yakop niia to lepoogh, o ateg izi!”

⁶ Saawe tau yei nileep izi taan sirivu to Eprata yei nilooŋ Bokis to Saveeŋ Mbuaaŋ vaaru. Tauvene nila le nighita igheen igharau nugh Yar.

⁷ Murei ra, tisakia ila Yerusalem. Tauvene nisaav nighe: “Taburig tala pa Maaron niia to lepoogh ta Yerusalem we. Tala tagharau niia to ghamuuŋ pooz, ve taput agheen pani, ve tapakuru.”

⁸ O Yoova, uburig toman Bokis to Saveeŋ Mbuaaŋ, ve ula pa niam to mariaoŋ. Bokis tawe ta imin ilaal pa tapirim.

⁹ Yei nighe ŋgar duduuŋa igheen ariaaŋ ila to zeran tsio to watooŋrau, imin nonoghiiŋa tau monmon tinonogh zi pani. Ve yes tau lolozi isaghav ghom ariaaŋ ve titaghon eez tsio na, nighe tiyoor ezam toman lolozi poia.

¹⁰ O Yoova, matam iŋgal besooŋa tsio David. I ndaamo payei, tauta nighe ulooŋ suŋuuŋ tsiei tane. Paaghu tooni tau yo ughuru imin kinik payei na, ughur murim pani sov.

¹¹ Muuŋ, Yoova imbu saveeŋ ariaaŋa tomania David, ve ipariaaŋa le iyaryaaŋ kat. Tauvene irau ireua mako. Isaav ighe: “Yau aat naghur paaghu tsio eta imin kinik, leso igham niam, ve ileep ila niam to ghamuuŋ pooz.

¹² Ve isaav ighe paaghu tsio matazi kisin saveeŋ mbuaaŋ tsiau ve titaghon tutuuŋ tsiau, ene pale naghur paaghu toozi paam timin kinik, ve tileep ila niam to ghamuuŋ pooz ta aazne, ve taghon taghon gha ila. Tutuuŋ tana, yau taug pale napaghazoŋai ŋgara pazi.”

¹³ Yoova isiigh nugh Zion, ve ighamu imin le wa. Nugh tane, ta i loolo pani ighe ileep ila.

¹⁴ Tauta i isaav ighe: “Nugh tane pale imin niag to lepoogh irau saawe. Niag to ghamuuŋ pooz aat igheen ta sene. Pasaa, lolog pa nugh tane kat.”

¹⁵ Yau aat nagham poghania yes to Zion, ve poia tsiau tiina izaa toozi. Leso tirau kat pa gabua naol. Ve nagham aniiŋ pa yes mbolaaŋa toozi, ve tighan le apozi isuŋ.

¹⁶ Ve yes to watooŋrau tau tileep izi Zion na, yau aat napalot zi pa uraat toozi. Leso timin eez pa uleeŋ tsiau ila pa tamtamon. Tauvene tamtamon to Zion tau lolozi isaghav ghau ariaaŋ ve titaghon eez tsiau na, pale lolozi poia ve tiyoor ezag toman aliŋazi tiina.

¹⁷ Paaghu to David tau naghuru imin kinik ve ileep izi nugh tane na, yau aat nagham eeza ve tapiri ivot imin tiina. Kinik tau yau taug nasiigho ve naghuru pa uraat na, yau aat napalot paaghu tooni, ve tigham pooz taghon taghon gha ila, imin lam tau iyaryaar irau saawe.

¹⁸ Yau pale natatan kinik koiŋa, ve monmon tilepleep toman mayazi. Eemon yes tau tilepleep ila i saamba na, yau aat napalot zi, ve nagham zi tileep poia kat. Leso lepoogh toozi poia tawe imin pabodeeŋ kinik.