Matthew 28:1-17

¹Arlta ltyerrey-angker Ingkeny tyerrelhey-alentyel, Mary Magdala-areny Mary ingwer-then alhek, intey renh aretyek.

²Ikwer-penh ahern akngelhekarl ratherr awek, Ingkart-kenh angel ikwer-atherr-warl apetyek irrwerl-they. Ranem apwert renh atwepert-iwek, ranem apwert ikwer-itwek anenh.

³Angel ranem lyenentyel-apeny arrtyernek, arnkwan ikwerenh arlter innga.

⁴Ahelengkw-rnem aterirremel ahern-warl aytnek, ipmapeny-anem ayntenh.

⁵Angel angkek ikwer-atherr, “Aterirrey-angenh anenherr-atherr! Atha mpwelanth iterl-areyel. Mpwelanth Jesus-ek nthweyel, arwerl ilpeyl-atherr-warl atanthekek.

⁶Ra nhenh aney-angenh-anem. Akngeyel renh itethilek, weth rarl ingkerrenhek arrwekel ilelhek-angkwarr. Apetyenherr-atherr, intey renh aretyek, rarl ayntenh.

⁷Alhenherr-atherr, kwertengerl ikwerenh-rnem iletyek, rarl ipmepenh itethirrek. Ra Galilee-warl alhek arrwekel, arrantherr alhetyek renh arey-alhetyek. Alakenh-anyem ayeng angkakert apetyek, mpwelenhanth atha ilek.”

⁸Ratherr aterirremel-antey anterrek inkwerelhemel, kwertengerl-rnem iletyek.

⁹Jesus-el renh-atherr rlwatek, ratherr-anem kwenirremel arrernelhek ingkety atherr anterrkwek, ikwer inkwerelhek.

¹⁰Jesus angkek, “Aterirrey-angenh, kwertengerl atyenh-rnem ilenherr-arey, rernem ayenh Galilee ikwer-itwek arey-alhetyek.”

¹¹Ratherr alhenharl-antey ahelengkw-rnem tern ilkwewarl alhek. Rernem tyaty-areny atyetyart-rnemek angka ilek.

¹²Atyetyart tyaty-areny-rnem-then rernem angkerrenh, ahelengkw-rnem payemeletyek rernem menty akater anayntetyek, ingwer-rnemek angka Jesus-akert iley-angenh, rarl itethirrek. Atyetyart ingwer-rnem angkerrenh arrpemarl.

¹³“Ingwer-rnem ilayntenherr-arey, kwertengerl weth-rnemelarl arrewaly tyerremel irrtyert akngek, awenng-they. Anwantherr arnkwa ayntenharl-antey.

¹⁴Pilate ra angka awenty, mwerrarl anwantherr renh ilem, nthakenh arrenhantherr ayntarrp-ileyangarl.”

¹⁵Rernem ahelengkw-rnem man payemelek. Rernem-anem akater anenh. Apmer Judea-areny-rnem rernem arraty iterl-arey-angenh-antey.

¹⁶Kwertengerl 11-pel alhek Galilee-warl, apwert ilkwewarl, Jesus-el kel renh-rnem ilek arrwekel, renh rlwatetyek.

¹⁷Rernem renh arek, ikwer inkwerelhemel. Ingwer-rnem arrangkwarl, ikwer irrpelthirrenh.