1Ja Jesus dunkana wonti ja Godaia pungandru wapana wonti; ja mili nunkani nunkangu wokarana wonti, nunkangu Godaia punga wotini wondrala.
2Jesus tanangu jatana wonti: “Jura najiai jenia pratjana? Morlalu ngani jurangu jatai: Wata marda kulno marda kulnuni parala nganai ninaia tanali wata wokarihala nganai?”
3Nau maninindri mardawonpani ngamana ngarina, mili nunkani nunkangu pilki wokarana wonti ja jatana wonti: “Ngaianingu jatau, winta jenia pantjila nganai? Ja mina jinkani tikani ja mita maruja mudani malka nganai?”
4Ja Jesujeli kalabana wonti ja tanangu jatana wonti: “Ngamalkaterianau, kulnujeli jurana karkarkaiati.
5Ngangau marapu talani ngakanani wokarala nganai ja jatala nganai: “Ngani Christus nganai;” ja tanali marapu karkarkala nganai.
6Jura ngarala nganai tirimalina ja tirimalinani pinti: ngamalkaterianau ja wata japali pantjianau; ngangau jenia pratjana pantjinanto, ja mudani jendranguta wata kantji nganala wapaia.
7Ngangau kana wolara tiriterkakala nganai kana wolarani ja mitaia kaparaia milila mitaia kaparaia mililani ja maua pirna ja muntja pilki ja pilki nganala nganai, ja mita wiltjiwiltjila nganai mankamanka.
8Jenia pratjana ketjaketjanaia wonini nganai.
9Ngadani tanali jurana ngulkujeli jinkila nganai ketjaketjananto, ja jurana nari ngankala nganai, ja kana wolarantiana pratjana jurangu kalakalarila nganai ngakani talandru.
10Ja ngadani marapu kalakalarila nganai ja ngulkuterkalkijiribamalila nganai ja kalakalarilkijiribamalila nganai.
11Ja Jedikantji-Propheta marapu terkakala nganai, ja tanali marapu karkarkala nganai.
12Ja ngangau delkina pirna pirnarila nganai, kana marapuja ngantjani maltirila nganai.
13Worana wonki ngamai ngadajelu, nulu tepi pirna manila nganai.
14Ja tanali ninapini ngantjani jaura mililandru mita maruni kaukaubala nganai, kana warupotuni malka nganananto, ja ngadani mudani wokarala nganai.
15Jura “duljadulja-tjautjau” najinani, nunkangundru Prophatali Danielali kaukaubana wonti, nau piri kulikirini terkai, — warle jenia warapai ngundraiatimai —.
16Ngadani tana Judaia mitaia mardawonpaia japa min-driatinimai!
17Worana punga mangatandrani nganai, wata ngarina tikaiatimai, nunkani pungandru minakulno manila,
18Ja worana maruni nganai, wata karitjina tikaiatimai kati nunkani manila.
19Jakajai tanangu mandranrjani ja ngama jinkinietjani tanangupini ditjini!
20Ngatjianimai jurani japa mindrini wata pantjinanto kilpani kara, Sabbat ditjini kara.
21Ngangau ngadani ketjaketjana pirna nganala nganai, worderu mitaia woninandru wata nganana wonti kararielu ja bakana wata morla nganala nganai.
22Ja tanapara ditji wata wordurinani, kana pani tepi pirna ngamanani; windri kanandru, tanana Nulia kalkalkana wonti, tanapara ditji wordurila nganai.
23Jendranguta kulno jurangu jatanani: Mai, ninkida Christus nganai kara, jerra Nauja, jenia wata morlalu ngundranimai.
24Ngangau Jedikantji-Christus wora ja Jedikantji-Propheta wora terkakala nganai, ja tanali malka pirna ja pirnala jinkila nganai; ngangau tana ngurunguru ngananani, tanali bakana karkarkananto, tanana Nulia kalkalkanala.
25Mai, ngani jurangu jenia ngopera jatana warai.
26Tana jurangu jatanani: Mai, pitarani nau, wata wapanau; mai, nau pnnga mandrani, wata morlalu ngundranau.
27Ngangau worderu talara praitji dunkai tiriwandru ja mintjiai jendakarajelu, jeruja bakana Kanaia Ngatamuraia tikani nganala nganai.
28Ngangau woderi pundupundu parai, jerra kukunka jurboriai.
29Tanangupini ketjaketjani ditjini ngadani nurujeli ditji pirna ngalpuru pantjila nganai, ja pirali praitji nunkani wata jinkila nganai, ja ditji waka wora pariwilpaia purila nganai, ja pariwilpaia ngurula wiltjiwiltjila nganai.
30Ja ngadani Kanaia Ngatamuraia malka pariwilpani wondraterila nganai, ja ngadani kana wolara mitani juajuangala nganai, ja tanali Kanaia Ngatamura talara palkujeli pariwilpalali wokaranani najila nganai ngurunguru ja pirna.
31Ja Nulia angela worana nunkani jinpala nganai wima kokujeli ngaiala pirnali, ja tanali mapala nganai, tanana Nulia kalkalkanala, watara mandru ja mandrundru pariwilpaia wondiri kulnundru wondiri kulnujelu.
32Tandra nindrindru jeribaka malka kiririanimai; ngu-nanguna nunkani matja kuljakuljarina ja talpa matja punkana, jura ngujamai woldrakanja karakara nganai.
33Jeruja bakana jura ngujamananto, jura jenia pratjana najinani, nau manani karakara nganai.
34Morlalu ngani jurangu jatai: Naupini nguja wata mudala nganai jenia pratjana pantjinantulu.
35Pariwilpa ja mita maru mudala nganai; jaura ngakani wata mudala nganai.
36Ninapini miljaru ja ditji wata kulnujeli ngujamai, bakana wata angelali pariwilpani, a-ai, windri Ngaperali ngakanali.
37Worderu Noani ditjini, jeruja bakana Kanaia Ngatamuraia tikani nganala nganai.
38Ngangau worderu tana ngarimataia ditjia woljaia ngamana wonti; tanali tajina wonti ja tapana wonti, noa patana wonti ja noa pantjina wonti nunkangupini ditjielu, jendranguta Noa bota pirnani wirina wonti;
39Ja tanali wata ngundrana wonti ngarimata wokara nantulu ja pratjana tundribanantulu; jeruja bakana Kanaia. Ngatamuraia tikani nganala nganai.
40Jendranguta mandru maruni nganala nganai, kulno Nulia patala nganai, ja kulno Nulia worarala nganai;
41Widla mandrujeli turara ngankala nganai marda watieli, nana kulno Nulia patala nganai, ja nana kulno Nulia worarala nganai.
42Tepi ngamanau, ngangau jura wata milkila, mina ditjini Kapara jurani wokarala nganai.
43Jenia ngujamanau! Punga ngamalkanietja milkila ngananani mina ditji tinkani kurikantji wokarai, nau tepi ngamala nganai ja ngandrawalkala nganai, nau wata pungani nunkanani wirinanto.
44Jendrania bakana jura ngankingaterianau! Ngangau ditji kulnuni, nina jura wata ngundrai, Kanaia Ngatamura wokarala nganai.
45Worana mili talku ja kiri nganai, nina kaparali najinajibanietja milini nunkanani kuranala, nulu tanangu buka ditji talkuni jinkinanto?
46Murlali pirna jenipara mili, nina kaparali nunkanali, nau wokarana tikanani, jeruja ngankanani mankamankala nganai.
47Morlalu ngani jurangu jatai: Nulu nina kapara kurala nganai nunkani poto pratjanani.
48Naupara mili madlentji ngarali nunkanali jatanani: Kapara ngakani kalkai wokarala,
49Ja nulu woninani kamaneli nunkani nandrala, ja muntali nau tajinani ja tapanani tapanietjali jela:
50Jenipara milia kapara wokarala nganai miljaru kulnuni, nina nulu wata ngundrai, ja ditji kulnuni, nina nulu wata ngujamai,
51Ja nina terti tjelapalkala nganai, ja nunkangu kalala nunkani kana jeljujelju jeribaka kurala nganai; naka tana pirna ngirikidala nganai ja mana katakatangala nganai.”
