1Iyam-nen ga̱boug, illivans tasiyas tanuwgwes lun situwa̱vek sisiyas tammwayas, idokes kadiloka beiweiys Yeisuw, beimat.
2Naman iyawanis vatul waseg, itokes, inawes Paylat waseg, guma-Lom towen sigabman avakaein.
3Yudas, mtowen tasilkodein Yeisuw, ikakina beiweiys Yeisuw, ikanavin nanon, iyamen maysan towen, money silib sinawatoun, bisekes kid tanuwgwes lun situwa̱vek sisiyas tammwayas, ilana, “Agusinap kalbaleb; bo asilkod gamag towen bwanabwein.” Iweis tasiyas, ilansa, “Ya̱koum muwotet; yakamey nag.”
5Yudas ipiyev money towen, ilev in Yowbad wanbunatum wanuwan, inoun in, ikow vatul, iyawen kayon mo ikayagweg, imat.
6Tasiyas gog tanuwgwes lun situwa̱vek ikawes money towen, ilansa, “Towen maysan gamag buya̱vin, awoum binek Yowbad namuloul. Ama̱wan bitavkakes money towen?”
7Mapuna iyamiyises tawtelein loutan napwepway, va̱gan kid bidibwanis takanigs asibwabwal igaw bikanka̱nigs ven towen waseg.
8Peinan money towen maysan gamag buya̱vin, mapuna tadokes pwepway towen yagan “Gamag buya̱vin pwapwayein.” Tut towen waseg pwepway yagan ma̱wan.
9Iva̱ges ma̱wan, mo ikamat liva̱nen palopit towen Yelemay, peinan kweiboug ilivnek mamagina: “Ikawes money silib sinawatoun, maysan mtowen min-Yisleil bo ikaliwages, mo iyamiyises tawtelein loutan napwepway. DaGuyaws bo ikaliwageig ma̱wan.”
11Inawes Yeisuw gabman waseg, itow wamatan. Mtowen gabman mo ikatigan, ilana, “Tabta ya̱koum min-Yudiy siking ya̱koum?” Iw to Yeisuw ilana, “Ma̱wan amlivan.”
12Tanuwgwes lun situwa̱veks sisiyas tammwayas mo iyateles Yeisuw; towen gog nag ikatimop ikka̱pay-wan.
13Iw to Paylat ilana, “Tab kwatiligen liva̱neim babaw illivans?”
14Towen gog nag kweitan livan iyamen; mapuna gabman towen bo isunasun nanon.
15Bweilim katanok katanok sagal towen waseg, gabman ansinap bilik tasiwun deil, am-towen sivines tababaw gamag. E, bilik mo bein wamnat.
16Teitan wa̱deil nises, butun avakaein peinan ansinap kalbaleb, yagan Yeisuw Bala̱bas.
17Katikunouks gog gamag babaw, Paylat ikatugan, ilana, “Kal sivinamiy? Kwavtagis yagan mo balik bein wamnat. Tabta sivinamiy Yeisuw Bala̱bas? o adok sivinamiy Yeisuw, mtowen idokes Kelis? Takaleiwag yakamiy.”
18Ikakin geg iyateles Yeisuw peinan ikamliwes.
19Tage mtowen Paylat issin wakaban va̱gan bikaleiwag, Paylat nakwav mo ikayeb natouwat inek, isek aygan nakwav mamagina, “Awoum kuvag aveiyag taw towen waseg. Gamag towen bwanabwein. Boug akamikon towen silma̱nin; mapuna singay igeg nanoug.”
20Bo itatays ninous gamag babaw, tasiyas tanuwgwes lun situwa̱veks sisiyas tammwayas; ilansa, “Kwavtagis Bala̱bas yagan; Yeisuw gog beimat.”
21Vayuwein gabman towen ikatugan; ilana, “Asteiy wa̱deil nisesus. Am-towen sivinamiy balik beiw wamnat?” Ilansa, “Bala̱bas.”
22“Tage aveiyag bavag waseg Yeisuw? Mtowen idokes Kelis.” Ilansa, “Kwatimet waklos.”
23Iw to Paylat ilana, “Aveiyag wawun? Nag ivag ansinap kalbaleb.” Iweis tasiyas, iwkuwaks, ilansa, “Kwatimet waklos!”
24Paylat go ikakin ta-ma̱wan binuwek, peinan kakita bisilamaws kawpwanaw; mapuna idow natouwat, ilana, “Soup kumey, bawid namag.” Imey, iwid naman wamtes gamag babaw, ilana, “Yey nag ba̱weiy gamag towen bwanabwein; e, takaleiwags yakamiy.”
25Iweis tasiyas, ilansa, “Yakamey bakakaleiwag, baka̱weiy; mawotet towen mapun bakalivet simayas nitimayas.”
26Paylat mo ilik Bala̱bas, inekes tasiyas. Ilivan gog Yeisuw beiweiys vatul waseg, bisekes asibabaw bikatimates waklos.
27Gabman nagamag tasiyas takannaviys itokes Yeisuw inawes wasibunatum bunavakaein. Takannaviys asibabaw ikatuyouns nimeis, inibwis Yeisuw anakweim, ivaskoumis anakweim avakaein bwabwel. Ikous, mo ikawes vatul kulikoul mamagina doudiw, ikwanis isenas wakunun, magina anapay; nakaytuk isekes wanaka̱tay; mo ikululs wamatan, ilansa, “Kalin nuwem ya̱koum, min-Yudiys siguyaw ya̱koum!” Isiba̱wes igegayous.
30Ikous, mo igusus won towen, ikawes nakaytuk iways wakunun.
31Isiba̱wes ikous, mo inibwis maynawen kweim bwabwel, ivaskomis anakweim tatonen, itokes, inawes beiweiys waklos.
32Isekes Yeisuw anklos kaytan beikew, inounas. Wa̱ked mo ilivatus gum-Saylin yagan Saymon, ilansa, “Kukow anklos taw towen.”
33E, Saymon ikokew Yeisuw anklos, inounas ineis koy yagan Golgot. (Takativin livan bein aga-Muyuw ‘Takanig busabwesan.’)
34Bo isekes Yeisuw wayn son a̱lun beimoum, va̱gan mamayuy biyenom; ikamkwen, ipiyev.
35Pwapwat ikatikavates wanaman o wakaken; ikayagweg waklos. Takanaviys tasiyas iyakousis wotet towen, mo ikaliwages anakweim, kalisiy bikawes, mamagina makava ilaves kweitan youd silma̱nin bikines kalisiy bikawes asikweim tatanok tatanok tasiyas.
36Ikous, mo isinis, imtakavates.
37Anklos wakunuwatan ileles nakalbaleb mamagina, “Mtowen Yeisuw, min-Yudiy siGuyaw.”
38Siney tavveinaws asteiy iweiys waklos, teitan wanaka̱tay, tayuwein wankimaw.
39Tasiyas gog inounas makadewen ked isiba̱wes, asilivan kalbaleb, ilansa, “Ya̱koum kudoki bukugulek Yowbad nabunatum, bukuwlulavaw gog yam kweitoun. Magat Yowbad Natun yak, kubus kum, kuymoveim.”
41Ma̱wan-vak tanuwgwes lun situwa̱vek, sisiyas takatimkakeins kaleiwag, sisiyas tammwayas iyages Yeisuw, ivtokes livan, ilansa, “Bo ikatinabwes gamag mwasanin, nag kadilok bikatinob tatonen.” E, ilansa, “Mtowen kid Yisleil guyawun, kadiloka beibus waklos beim, mo bitaliganes anilivan. Peinan anilivan, ‘Asimounid Tamag Yowbad waseg; yey Yowbad Natun yey.’ Magat Yowbad sivinan gamag towen, kadiloka beim bikatinob.”
44Ma̱wan-vak tavveinaws tasiyas asteiy nikayagwegs wasklos, iyages Yeisuw.
45Ya̱nay idadub ven babaw ee... ka̱las itageg mo ikamnat vayuwein.
46Igaw dadub ven, Yeisuw mo iwak, aygan avakaein, ilana, “Eli, Eli. Lamasabaktaniy.” (Takatavini go bein aga-Muyuw waseg: ‘Guna Yowbad! GunaYowbad! Aveiyag wawun nukulisaweig?’)
47Gamag mwasanin nitatos wadadan iliganes, idokes Yeisuw ididow kid Ilaytiy.
48Mapun teitan isawl in, ikow yotout isen wayn yayan wanuwan, ika̱lawt yotout, ibes wamatan kayal iyasel, isek Yeisuw, imoum.
49Mwasinis gog ilivans, “Ga ises. Adok Ilaytiy beim bikatinob. Ga takines.”
50Vayuwein Yeisuw mo iwak, aygan avakaein, kululuwan ilisow, bo ikanig.
51Maynatan kweim nisilbwed palakakit, Yowbad wanbunatum, tut towen waseg mo iksigeb maynawen kweim; isilamaw wanakaew, iksigeb in watinow, ivag mwayney. Nik ivag, dakul itavis, alawag ikaliyowes, tadidumwals mwasinis nimmasis wakalugwes, tutan Yeisuw ikit vayuwein mo ikits tasiyas, inounas ineis Yelusalem, gamag babaw ikines.
54Takalikay towen siney tasiyas takannaviys imtakavates Yeisuw, ikines nik, ikines youd siyas nikamats; aspwa̱yat, ilansa, “Mounid Yowbad natun.”
55Vinay mwasinis itowas tanbes. Na̱tan vinen-Magdal yagan Meliy; nayuwein valeyin, mana̱wen nitun tasiyas Yemes son Yosep; natounun Sebediy nakwav, ivag nitsiyas tawaw asteiy; sisiyas vinay mwasanin. Tasiyas kweiboug sisiy Yeisuw meinoy Galiliy nimeis, o yam babaw imtakavates. E, tasiyas itowas tanbes ikakins.
57Yeisuw inavamul guyaw teitan yagan Yosep. Inaven Alimatiy. Yam towen kwayav waseg inek Paylat, initoug kaleivin Yeisuw bidibwen. Paylat itam.
59Yosep ikow kaleivin Yeisuw, isumweil kweim pwapwa̱kaw gimagim, isen wakalawag. Inakalawag takunumwan kweitan bo itateiys wanuwan dakul, bo imlavag Yosep alawagan tatonen. Isen kaleivin Yeisuw wanuwan, iyatipin dakul avakaein, ikatibwed wadon leg, mo inoun.
61Vinay asteiy isiwas tanaban isinis ikikines, vinen-Magdal yagan Meliy son valeyin.
62Yam towen ikatunags silma̱nin sagal. Iyam-nen mo sagal; tasiyas tanuwgwes lun situwa̱vek sisiyas tasiyas Palisiy mo ikatuyouns inekes Paylat, ilansa, “Tamwey, kanuw anilivan tayyaweid towen, igaw mwamov, ilana, ‘Yam kweitoun mo ba̱kit vayuwein.’
64“Kadiloka kukwaleiwag gamag mwasanin bimtakavates alawagan kweitoun yam. Mata ge navamul bineis ivenos kaleivin, mo bidibakes gamag, bilansa, ‘Bo ikit vayuwein.’ Singay mo bikatimweisis yaweid, bikatidavis gamag babaw.”
65Iw to Paylat, ilana, “Takaymateins alawag nisesus wasigeis yakamiy. Kuneis kuwteles ma̱wan beibwein.”
66Ineis tasiyas; youd mamagina kaybas ikawes, ipakus wawadon leg; takannaviys isekes siwotet imtakavates alawag towen.
