Matiu 13

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Kum me desiroma Iesu gwe dauwag aine sira poeman visive yan wakene.

²Iyayapan obiren me gumbe birorot agoniyaya, meoya me wa danave unig aig yan wakene, meve iyayapan undag awau visive wan yoiya.

³Sira me dividivi obiren maibe gumbe wag dirumne, Nau abnawa yawa meuma emetan oya dauwag aine.

⁴Meve me yawa emiviwa, upeba ebu taibe aigiya. Nenip uwag undag naboriya.

⁵Upeba an egave aigiya, asime piyu koka onan. Mu tatevit dumiya, kuiyawa piyu kusi da egave.

⁶Megara kum dauwag mu igamne undag toyaimusia, kuiyawa mu taiwa epampa den aigiya.

⁷Yawa upeba gan danave aigiya. Yawa yaig yoiya, go gan warumne.

⁸Yawa upeba piyu oraiwa egave aigiya. Upeba 100 mina natawa inamiya, upeba koniwa 60 mina natawa inamiya, upeba koniwa 30 mina natawa inamiya.

⁹Bira da naunawa gaibuwa kweya anope.

¹⁰Aigowawa Iesu gumbe uwag singui aya, Divi oya ge iyayapan maibe gumbe dirumege?

¹¹Me gara wane, Kwimin toimuwawa anoano guwavewa me wait toyau yenna, megara mu ne den guwavewa muneni.

¹²Bira da me aunewa, me matai sira egave kokavit aupe. Bira da me den aunewa, me matai gumbe atan aupe.

¹³Ne maibe gumbe dirumeni: Mu yaveme, go mu den yaupe; Mu anoeme, go mu den anope sira den yaug anope.

¹⁴Propeta Aisaya wanewa mu danowo natawa matadne: Ye anoene, megara den di yaug anoya; ye yavene, megara den di yaug anoya.

¹⁵Kuiyawa iyayapan mame nonowa e den sivi, mu naunowa boredne, sira mu yangowa abumiya. Mu yangowo den yaveme. Mu naunowo den anoeme, nonomagave den yaug anoeme, sira nonomagawa den tobieme. Ne den warinamuntna.

¹⁶Megara, yangewa waribiyane, kuiyawa mu yaveme, sira naunewa waribiyane, kuiyawa mu anoeme.

¹⁷Ne natawa diruitna. Propeta ge apan oraimumuwa obiren ye yavenewa mu yautan anoya, megara oma den ane yauya, sira ye anoenewa mu anotan anoya, megara oma den ane anoya.

¹⁸Meoya yawa emeiviwa abnawa maibeyawa ye anoya:

¹⁹Apan da God toimuwawa gaiyawa anog den yaug anopewa, me danave vednewa me matai airapu kukaeba uwag aug aipe. Mame me yawa ebu taibe vednewa.

²⁰Apan da yawa an egave emiviwa me gae anog koni degadega gumbe avivi abnawa.

²¹Megara, me taiwa onan, kum koni pipi aigimpe mina. Kuiyawa gae oya ibnawa go edawai uwapewa me tatevit uyug aikpe.

²²Apan da me yawa gan danave tamiviwa, me gaiyawa anope, go piyu mame anoano meuma anope sira dividivi tawara oraimumu ugai wampe me gae imiwa atataipe, natawa den impe.

²³Megara apan da yawa piyu oraiwa egave tamiviwa gae anog yaug anope. Me natawa impewa, upeba 100 mina, 60 mina, 30 mina impe.

²⁴Iesu maibe dawa mu dirumne: Kwimin toimuwawa me apan da yawa oraiwa nau meuma danave emivi mina.

²⁵Megara iyayapan kubvinemewa, anavi uwag nakwai wiit yapowo wayo emeg aine.

²⁶Nakwai wiit yaieg dumeg uba toya, go wayo gaibu yaiya.

²⁷Kokawa nau igiyawa meuma uwag gumbe waya, Kokawa, ge yawa oraimumu nau geuma danave emeyana, go onan? Wayo ampa uwaya?

²⁸Mame anavi ane, kokawa garawa wane. Nau igiyawa me dig waya, Ge anoegewa nu an undag biyauta?

²⁹Me garawa wane, Onan, kuiyawa ye wayo biyauyawa ye nakwai wiit gaibu biyauya.

³⁰Kweya undagit wakepe duwam yoipe, meve maura kumiwa uwape. Me kumiwa apa kwaptan igiyawa dirumpna, namu wayo wat agoniyag itap tug iyam yangave aorepe, meve nakwai wiit wat agoniyag tam onampe buim neuma danave teya.

³¹Iesu me maibe dawa mu dirumne: Kwimin toimuwawa me gayum yawa mina. Apan da me aug aig nau meuma danave vedne.

³²Gayum yawa me yawa undag yapowo kusikareren. Megara, me yainewa, me nau danave yoiemewa yapowo kokavit ane sira yoma mina ane. Nenip painauwa uwag naniwa gumbe en wariya.

³³Sira me maibe da mu dirumne: Kwimin toimuwawa me iist mina. Vesin da me aug parawa me 3 saton danave bidwag ag kamasiyanewa, parawa tan koka ane.

³⁴Iesu dividivi undag mame maibe gumbe iyayapan dirumne; me maibe den kwene dividivi undag maibe gumbe dirumne.

³⁵Me propeta gumbe gae wanewa natawa veniyatan oya: Ne nonwa maibe gumbe watapna, piyu amatog onnewa dividivi guwavewa ne gae diruitna.

³⁶Meve Iesu me iyayapan undag kwem gwe dana unig aine. Aigowawa meuma me gumbe uwag waya, Wayo maibeyawa natawa didnuna.

³⁷Iesu garawa wane, Yawa oraiminawa emiviwa me Apan Usiwa.

³⁸Nau me piyu mame undag, sira yawa oraiwa me God toimuwawa usitainawa. Wayo me airapu kukaeba usitainawa,

³⁹sira anavi me wayo emenewa me airapu kukaeba. Maura kumiwa me kum oieba sira kwaptan igiyawa me aneya.

⁴⁰Meoya wayo biyaupe sira iyam oketpe igampe, kum oieba kumiwa me meib.

⁴¹Apan Usiwa me aneya meuma tepe dauwag ampe. Me dividivi kukaeba emewa undag ge ano gwambe emewa undag toimu meuma danave agoniyape.

⁴²Mu iyam meru danave emepe. Mu iruwaigimpe sira donowa kitosaigimpe.

⁴³Me apa oraimumu igiyawa mu Mamowa toimuwawa kwiminau danave kum mina yuigimpe esigimpe. Bira da naunawa gaibuwa kweya anope.

⁴⁴Kwimin toimuwawa me nau danave divi da oraiminavitwa guwavewa mina. Apan da me yaupewa, me guwave sira baraupe, degadega ag taig aipe. Me dividvi meumawa undag gwiruwat anmaga aupe meve nau me gwiruwat aupe.

⁴⁵Sira kwimin toimuwawa me gwiruwatwat abnawa me keri oraiwa didimama aivi mina.

⁴⁶Me garawa meuma koka da desirom yaupewa, me aig dividivi meuma undag gwiruwat anmaga aupe meve keri gwiruwat aupe.

⁴⁷Sira kwimin toimuwawa me uwariri mina. Awau danave baraupe aikpe gwambui gina ubeube undag bope.

⁴⁸Me noidauwapewa, gwambui botag eme igiyawa me ororiyape dauwape awau visive baraupe. Meve mu yan wakeg gwambui oraiwa bog pot dana empe, kukaeba epa emepe.

⁴⁹Oieba kumiwa apa me meib ape. Aneya uwape togomiyape kukaeba igiyawa ube tepe sira oraimumu igiyawa ube tepe.

⁵⁰Sira mu iyam meru danave emepe. Mu iruwaigimpe sira donowa kitosaigimpe.

⁵¹Ye dividivi undag mame yaug anoyana? E, mu Iesu gumbe garawa waya.

⁵²Meve Iesu dirumne, Meoya ano kokawa igiyawa mu kwimin toimuwawa aigowawa ayawa mu gwe abnawa mina. Me buim meuma danave dividivi mataiwa ge nunganwa gaibu tampe.

⁵³Iesu maibe gumbe dirumne onananewa, meapa kwem aine.

⁵⁴At meuma uwane. Me amatog iyayapan sinagogu danave toyau munne. Mu undag terag singui aya. Apan mame anoano mame ge irayauyau yusiwa mame ampa aune?

⁵⁵Apan mame gwe sisi abnawa usiwa onan go? Inawa meuma iviwa me Meri, sira mu gwanebaviwa Jemus, Josep, Saimon ge Judas onan go?

⁵⁶Yogiyawaiwa meuma undag nu gaibu onan go? Apan mame dividivi undag mame ampa aune?

⁵⁷Sira mu Iesu gumbe ano topayaya. Megara Iesu dirumne, Propeta me gwetoimu meuma ge gwe meuma danowo mekut ebnotu gumbe da onan.

⁵⁸Iesu me apa irayauyau obiren den ane yauya, kuiyawa mu Iesu gumbe anotumat den aya.